Promé buki di regla di sòfbòl na Papiamentu produsí pa sr. Hellburgh Ku kontribushon di MCB, e Amigu di Deporte!


Promé buki di regla di sòfbòl na Papiamentu produsí pa sr. Hellburgh Ku kontribushon di MCB, e Amigu di Deporte!

WILLEMSTAD- Maduro & Curiel’s Bank, e Amigu di Deporte i spònser prinsipal di sòfbòl Fastpitch Femenino ku hopi orguyo a kontribuí na produkshon di e buki di regla di sòftbòl na papiamentu. Ku esaki MCB ta duna un granito mas pa sigui yuda pa halsa e nivel di e deporte di sòfbòl i alabes yuda kumpli ku e soño di sr. Julio Hellburgh ku pa años ta traha ku hopi pashon pa e deporte di sòfbòl.
Sr. Hellburgh semper tabatin e deseo di por tradusí e buki di regla di sòfbòl na nos propio idioma Papiamentu ku inisialmente ta produsí na inglés. Ku aprobashon di International Softball Federation (ISF) sr. Hellburgh a logra pone riba merkado e buki di regla di sòfbòl na Papiamentu. Esaki ta bira e di dos buki di regla di deporte ku ta keda tradusí na Papiamentu. Na aña 1938 Dokter Antoin Maduro tabata e promé hende ku a tradusí un buki di regla di deporte na Papiamentu. E tempu ei tabata e buki di regla di futbòl.
Sr. Hellburgh ke sigui duna su aporte na sòfbòl ku ta su pashon, i den kuadro di esaki sr. Hellburgh ta repartí e bukinan di regla na Papiamentu kompletamente grátis pa TUR organisashon di sòfbòl na Kòrsou.
Awor ku nos tin nos buki di regla di sòfbòl na Papiamentu, nos sòfbòlistanan, téknikonan, fanátikonan di e deporte i e miembronan di kuerpo di empayer i skorernan por lesa esaki i komprondé e reglanan muchu mas fasil. Esaki naturalmente ta alsa nos konosementu di wega i e nivel di sòftbòl aun mas.
Tur teknikó, kuerponan di empayer i skorer ku ta interesá den un buki di regla di sòfbòl na Papiamentu pa nan miembronan por tuma kontakto ku sr. Hellburgh.

MCB, É Amigu di Deporte ta gradisí sr. Hellburgh pa su kontribushon na sòfbòl i deporte en general.

8 di sèptember 2016
img_4407

img_4408

Advertisements