KOMUNIKADO DI KUERPO POLISIAL KÒRSOU Tópiko: intento di ladronisia ku detenshon (polis ta tira ladron den lomba)

KOMUNIKADO DI KUERPO POLISIAL KÒRSOU
no.: 337 / 2016
Fecha: 3 òktober 2016
Tópiko: intento di ladronisia ku detenshon
Departamentu di Komunikashon i Prevenshon

KUERPO POLISIAL KÒRSOU SIRBI I PROTEHÁ

________________________________________

Djaluna 3 di òktober 2016 alrededor di 14.04 or, Sentral di Polis a risibí notifikashon ku ku den un kas na Jongbloedweg tin dos hòmber deskonosí ku intenshon pa hòrta. Un unidat polisial ku tabata bayendo na e sitio a mira dos hòmber bula kura di e kas na Jongbloedweg. Na momentu ku nan a mira e unidat polisial nan a kuminsá kore bai den dos diferente direkshon. Polisnan a kuminsá ku un persiguishon na pia tras di e sospechosonan. Polis a sigui tras di un di e sospechosonan ku tabata bai direkshon di Erosweg i a ordená e sospechoso pa para. Esaki no a duna oido na òrdu di polis i sigui kore. Na e momentu ei e polis a los un tiru di atvertensia ku no a duna resultado. Seguidamente e agente a los un tiru dirigí riba e sospechoso ku a alkans’é na su lomba. A detené e sospechoso S.Y.P. nasé na Repúblika Dominikano di 37 aña di edat. Ambulans a transportá S.Y.P. pa poliklínika di SEHOS kaminda e la keda interná. Den área di “kabouterbos” polis a detené e otro sospechoso J.M.J.R. nasé na Repúblika Dominikano di 45 aña di edat. Ámbos sospechoso ta detené relashoná ku intento di ladronisia i destrukshon. A presentá e sospechosonan dilanti un fiskal ouksiliar ku a ordená nan enkarselamentu pendiente di mas investigashon.