Desaparishon di partido PAIS for di e plataforma polítiko
Desaparishon di partido PAIS for di e plataforma polítiko.
Willemstad, Ningun partido polítiko na Kòrsou no mester simplemente hisa nan skouder sin wak mas aleu awor ku pueblo di Kòrsou a ekspresá su mes di un forma asina devastador versus di partido PAIS. Preferiblemente tur partido polítiko na Kòrsou tuma masha na serio loke a sosodé aki. Un partido ku tabatin 4 asiento, komo tal tabata forma parti di gobernashon, direpente ta pará totalmente na banda! Sigur pa 4 aña, si e partido aki sigui eksistí, nan lo mester traha duru siendo pafó di parlamento pa buska sosten i konfiansa bèk. Lo no ta nada fásil den un periodo kaminda polítika en general mes ta pasando den momentonan di hopi turbulensia i kaminda den e pueblo tambe tin sierto tendensianan individualista i materialista ta dominá fuertemente.
Sin bai den detaye mes riba tur e konfliktonan interno ku partido PAIS a konosé, ni tampoko e linia ideológiko, mester remarká e forma ferfelu ku e partido aki a trata su votadónan. Despues di elekshon 4 aña pasá, sierto miembronan di e partido ku a sinti ku nan a haña poder porfin, a kuminsá kana kompletamente banda di nan sapatu, demostrando un airu di arogansia ku lo mester ta funesto pa kualke partido polítiko, pasobra ta duna e impreshon komo si fuera nan no sa ken tabata esnan ku a pone e partido kaminda e ta i a tres’é na poder. Den un komunidat chikitu manera Kòrsou, kaminda práktikamente tur suidadano konosé otro sea komo famia dirèkt, kasá of tin lasonan familiar di formanan indirekto, relashonnan di amistat etcetera, e komportashon manera deskribí ariba naturalmente ta kai masha malu mes! Hopi promé ku e resultadonan di djarason 5 di òktober último e tipo di krítikanan aki tabata bini padilanti versus di partido PAIS. Pa kolmo hopi biaha e partido aki tabata den atake, mustrando ku dede riba otronan su fayo, siendo e tabatin miembronan den parlamento, ministernan i hasta un presidente di parlamento pa por a profilá di un forma muchu mas atraktivo. Partido PAIS sinembargo a sigui dal bai sin pone atenshon na e forsa real di e partido, esta pueblo, no a kambia nada na su funshonamentu robes, pa awor despues di elekshon resultá den e situashon ku e ta aktualmente. E partido aki awor lo mester traha hopi duru pa lanta bèk riba su pianan, pero ta di spera ku lo el a siña di su fayonan kometé. Poder ta algu relativo, awe bo tin’e, pero mañan bo ta sin dje, anto bida ta sigui normal!!!!
Erwin Raphaela