Bandera Grill ke sa paradero di Belfilmar Camacho

Bandera Grill ke sa paradero di Belfilmar Camacho
Gerensia di Bandera Grill ta en buska di e dama Venesolana Belfilmar Camacho ku a keda buská pa dos agente polisial riba djaluna anochi alrededor di 23.45
Sra. Camacho a yega Kòrsou djadumingu, 9 di òktober 2016, anochi pa un estadia di 4 dia.
E agentenan polisial ku a buska e dama djaluna anochi a indiká na gerente di Bandera Grill ku un tanta a manda busk’e i e tanta ta na warda di polis, pues e tin ku bai warda ku nan. E agentenan tabata na jacket bistí di manera ku nan badge no tabata visibel i nan no a duna nan nòmber. Ta konosí ku tin agentenan polisial ta intimidá e damanan aki pa tene relashon seksual ku nan i e gerente no ta ekskluí esaki den e kaso aki.
Gerente di e establisimentu a bai warda di polis i Departamentu di Imigrashon, pero no a enkontrá e dama, tampoko un indikashon ni registrashon ku e dama a keda detené. E dama mes tabata tin komunikashon ku un amigu via whatsapp den kual el a indiká ku lo deport’é pa Venezuela.
Na e momentu aki tin un petishon di gerensia di Bandera Grill pa agentenan polisial lokalisá e dama aki pa motibu ku e tin un debe ku e establisimentu en kuestion. Alabes a keda konstatá ku 2000 dollar a pèrdè for di den e negoshi.
Tin un keho entregá na departamentu BIZ, sin resultado konkreto.
Sr. Luis Curiel di departamentu di Imigrashon ta na altura di e kaso i tin un sita ku Ministerio Publiko pa kontinuá ku e investigashon.