Maduro & Curiel’s Bank su brènch di Otrobanda tambe a hasi donashon na Kolegio Mgr. Willem Ellis i yama klientenan danki.

Maduro & Curiel’s Bank su brènch di Otrobanda tambe a hasi donashon na Kolegio Mgr. Willem Ellis i yama klientenan danki.

WILLEMSTAD – Djabièrnè 23 di sèptèmber Maduro & Curiel’s Bank a kontinuá ku nan aktividatnan pa yama nan klientenan ku ta bishitá nan brènchnan danki pa nan sosten, lealtat i konfiansa. E di nuebe aktividat na brènchnan den kuadro di MCB su rumbo pa 100 a tuma lugá na brènch di Otrobanda. Parti paden di e brènch Bo Banko Amigu a sorpresá klientenan ku dushi músika di “steelband”. Tema di e selebrashon ta “Otrobanda of the Seas”. Tur kliente ku tabata presente a haña e oportunidat pa gana un Kompa Leon Gift Card. Na total Bo Banko Amigu a regalá 5 Kompa Leon Gift Card na balor di NAf. 100,– kada un. Tambe MCB a sorpresá tur kliente ku a bishitá brènch di Otrobanda ku un dushi trit i un bunita rekuerdo. Mas atardi entre 6.00 p.m. i 7.00 p.m., den Breedestraat Otrobanda nèt dilanti di MCB su brènch, tabatin presentashon di koleganan di Otrobanda brènch, muchanan di Kolegio Mgr. Willem Ellis, MCB Centennial Band i Rei di Tumba Tico Balentien. Tur presente a gosa un bòl i naturalmente tabatin algu pa sisti e stoma i baha set. Komo muestra di apresio i sosten na e área di brènch di Otrobanda, koleganan i Branch Manager di Otrobanda brènch huntu ku miembronan di e tim di maneho di Bo Banko Amigu a hasi entrega di un chèk na balor di NAf. 5.000,– na Kolegio Mgr. Willem Ellis. Ku e donashon aki, MCB ta kontribuí pa maestronan i alumnonan di Kolegio Mgr. Willem Ellis por konkretisá algun di e bunita proyektonan ku nan tin planiá p’e skol.

Keda pendiente pasó e luna aki tambe, dia 17 di òktober Bo Banko Amigu lo bolbe sorpresá klientenan na un di su brènchnan.

13 di òktober 2016