​MOVEMENTU PAS TA YAMA DANKI NA SU 3452 VOTADONAN

​MOVEMENTU PAS TA YAMA DANKI NA SU 3452 VOTADONAN

Dia 5 di òktober último pueblo di Kòrsou a hasi uzo di su derecho pa skohe un Parlamentu nobo. 
Movementu PAS komo partido nobo a sa di logra un kantidat di 3452 voto den e elekshon aki. 
Na promé lugá Movementu PAS pa medio di e komunikado aki kier a gradisí tur e votadónan ku a depositá nan konfiansa den Movementu PAS.  Tambe Movementu PAS ke gradesí tur su miembronan, simpatisadónan i voluntarionan ku den e tres lunanan di eksistensha di e movementu a sa di hasi un tremendo trabou di kampaña elektoral den bario nan di Kòrsou.
Movementu PAS naturalmente ta felisitá e partidonan MAN, MFK, PAR, KDNT, PS, PNP, UKH i MP pa e resultado ku nan a logra den e elekshon. Ku e mandato ku nan a haña di Pueblo nos ta urgí e partidonan aki pa pone kampaña i interesnan partikular polítiko un banda i, ku interes general na pechu, awor si bai traha den parlamentu i gobièrnu na desaroyo, bienestar i adelanto soshal real di nos dushi Kòrsou.
E resultado di elekshon pa Movementu PAS lamentablemente ta nifiká ku pa e periodo parlamentario ku ta kuminsá novèmber awor, Movementu PAS lo no tin representashon den Parlamentu.  Pero e resultado aki ta demonstrá tambe ku e mensahe di Movementu PAS tin un base grandi i legítimo den nos komunidat. 
Pa e motibu aki tambe, Movementu PAS, ya a hasi e trámitenan pa sigui ku su lucha pa mas patriotismo den nos nashon i adelanto soshal di nos komunidat. Den e kuadro aki ya a instalá un komishon, bou di presidensha di sr. ingeniero Edil Poulina, ku lo evaluá e kampaña polítiko hibá i e resultado optené.  

Den novèmber aki mes miembronan di Movementu PAS lo bini huntu den dianan di estudio pa diskutí rumbo di e movementu i fihá e kuadro den kua lo sigui funshoná pa i ku pueblo di Kòrsou.
Movementu PAS a surgi dia 6 di yüli último i a keda fundá ofishalmente dia 27 di yüli 2016.  
Movementu PAS ta konsiente, mirando e interesnan neo-liberal partidista grandi i e materialismo kresiente,  ku e krusada pa mas patriotismo, mas bienestar i adelanto soshal real riba nos pais ta unu largu.Pero e ta tambe kontentu i konvensí ku dia 5 di òktober último e promé simianan pa e krusada aki a keda sembra. Sigur ta, ku ta ku Movementu PAS, Kòrsou lo logra mas.

Atentamente,

Dwigno Puriel Vanessa Bitorina-Eliza

Presidente Sekretario General