​PA ATENDE ASUNTUNAN RELASHONA KU AKUERDO DI KOPERSHON ENTRE MERKA I REINO ULANDES A TENE KONFERENSHA AWE NA KORSOU

​PA ATENDE ASUNTUNAN RELASHONA KU AKUERDO DI KOPERSHON ENTRE MERKA I REINO ULANDES A TENE KONFERENSHA AWE NA KORSOU
Na luna di Yüni ultimo a tuma lugá na Ulanda, firmamentu di un MOU (‘Memory of Understanding’), ku ta un akuerdo di koperashon entre Reino Ulandes i Merka. Aparte di e Minister di Hustisia di Ulanda, a firma tambe Ministernan di Hustisia di Kὸrsou, Aruba i St. Maarten. Ku esaki ta logra mehorá i fortifiká mantenshon di e sistema di derecho den tantu e parti di Karibe di Reino Ulandes i tambe na Ulanda mes i koperashon ku Merka.

Meta prinsipal di e akuerdo ta ensera, ku tur e paisnan enbolbí ta kompromete nan mes den kombatí krimen i terrorismo organisá ku ta krusa frontera. Esaki no unikamente lokalmente sino tambe den región. Pa por logra enfrenta e situashon di krimen den nos paisnan i den nos región, tur pais enbolbí mester oumenta nan forsa den kombatimentu di krimen i terrorismo.

Apertura di e asina yama, ‘Start Conferentie’ ku a tuma lugá awe mainta tabata na enkargo di Minister di Hustisia di Kὸsou, Mr. Nelson Navarro.

Minister Navarro den su diskurso a enfatisá e importansha pa stimulá aktividatnan konhuntu i interkambio di informashon den area di investigashon kriminal i mantenshon di orden públiko i seguridat; alabes ta imperativo tambe pa kombatí terrorismo en general, fortifiká e lucha kontra trafikashon di hende i kontra krimen ku ta keda desplegá via e sistema di Internet (e asina yama ‘Cyber Crime’).

Imperativo ta tambe pa hasi bon uso di sistemanan di training spesialisá, ku ta keda ofrese dor di partikularmente Merka, esaki siendo parti di e akuerdo di koperashon firma anteriormente.

E trainingnan aki además ta yuda den subi e nivel di integridat di nos forsanan uniforma, interkambio di eksperensha i muchu mas.

Presentashon  a keda hasi pa respektivamente siguiente personanan:

Den representashon di Konsulado Merikano, Sr. Rob van Reusel, den representashon di Aruba, Sra. Luella Emerencia, den representashon di St. Maarten, Sr. Ton Maan, den representashon di BES, Sr. Henri Hambeukers i den representashon di Kὸrsou, Sr. Heiko de Jongh.

Na e konferensha di awe mainta a asistí, funshonarionan di Ministerio di Hustisia di tur e paisnan den Reino Ulandes, representante di Konsulado Merikano, representantenan di Ministerio Públiko di tur e paisnan, funshonarionan di kuerpo polisial (KPC), aduana (Customs), Kustwacht, Koninklijke Marine, RST i otronan ku ta labora den e area di mantenshon di orden públiko i seguridat den tur e paisnan di Reino Ulandes.
E fotonan athuntu ta duna un bista di e konferensha realisá awe den oranan di mainta.

This site uses Akismet to reduce spam. Learn how your comment data is processed.

error: Content is protected !!
%d bloggers like this: