Aruba: Accion combina entre Polis y Kustwacht a frustra transaccion di droga
Accion combina entre Polis y Kustwacht a frustra transaccion di droga
Cu un total di 7 homber deteni y 7 bulto di droga
Diamars pa mas o menos 7:10pm, Warda Costa di Caribe Hulandes, na su stacion na Aruba a detecta riba radar un boto na altura di Santana di Cacho y a notifica Polis di San Nicolaas cu a activa mesora. Na yegada di patruya a topa cu dos hende homber cu bultonan di droga. A detene nan mesora y transporta ambos pa Warda di Polis na San Nicolas, mientras cu a pasa e droga pa e departamento concerni.
Polisnan di San Nicolaas y Santa Cruz, Polis Maritimo, Polisnan K9 y e Departamento di Droga a keda na e sitio buscando pa mas bulto di droga y posibel personanan cu por ta scondi. Pa mas o menos 9:10pm Kustwacht a detecta un otro boto riba radar un biaha mas y na unda a pidi yudansa di e Boto di Polis, esta PB-2 den cuadro di buskeda di e boto. A bin topa cu e boto pero nan a nenga di para pa cual a start un persecucion. Finalmente a logra para e boto y a detene esunnan abordo. Abordo tabatin 5 hende homber mas 3 bulto di droga. A tuma e boto den beslag y hib’e na Kustwacht.
Polisnan atento a keda busca, na unda a bin topa cu 1 bulto chikito mas di droga. Pues e accion a produci un total di 7 detencion y mas e 6 bultonan grandi di droga y un bulto chikito. Mester resalta e tremendo cooperacion entre Polis y Kustwacht, cu atrobe a duna resultado masha positivo.
