MANEHO DI DUANA TA HAÑA BON ASEPTASHON SERKA KLIENTENAN

MANEHO DI DUANA TA HAÑA BON ASEPTASHON SERKA KLIENTENAN
Willemstad – Djamars mainta, 15 di novèmber sala Wayaka di WTC tabata kompletamente yen pa presensiá e.o. maneho i prosedura nobo di Duana.  Na e okashon aki Duana a introdusí tambe entrega di petishonnan Online via su website nobo. E manehonan nobo di Douana inkluso fasilidatnan pa funshoná ku ménos papel menshoná a haña masha bon akohida serka Expediteurs i deklarantenan ku tabata presente. Pa e okashon aki Hefe di Duana señor Jules Ilario i diferente lider na Duana a duna un presentashon i a kontestá tur pregunta. 
Señor Ilario a  presentá e funshon i ròl di Duana, e logronan di e último aña i mei, manehonan ku a inisiá i a introdusí e plannan pa 2017 i 2018. Despues di e presentashonnan aki a toka turno na miembronan di maneho general i operashonal di Duana, ku a amplia riba e diferente manehonan nobo ku ta drenta na vigor entrante 1 di desèmber 2016. Señora Soraya Pols-Stricks a trata e kambionan den entrega di petishon di eksonerashon i deklarashon, señor Aldo Silvano ku maneho nobo di uso obligatorio di CRIB number pa tur habitante na Kòrsou ku ta importá un merkansia, señor Randall Lourens a atendé e parti di  deklarashon obligatorio via Asycuda di eksonerashon riba karga di partikular pa partikular. Despues tabata turno di señor Jesse Reite ku a presentá e kambionan di Asycuda, ku ta e sistema outomatisá pa atendé ku deklarashon di karga/produkto òf merkansia, ku lo tuma lugá den fase i  a presentá tambe e meta di komishon di Tarifa ku resientemente a instalá. Señor Eugene Gaari a elaborá riba e fasilidatnan di pago i e diferente dokumentonan mará na esaki i señor Ilario a terminá e presentashon ku e plan pa inisiá otro aña via nan Akademia, ‘Curacao Customs Academy’,  training pa por sertifiká deklarante i expediteur. 
Despues di e diferente presentashonnan e presentadónan i señornan Etienne Caciano i Leopold Raphaela a kontestá tur pregunta relashoná ku e manehonan nobo. Duana ta agradesidó na e feedback ku el a risibí di presentenan i e sugerensianan ku a bini dilanti, ku sigur lo haña debido atenshon. Por bisa ku ya kaba Duana a konsiderá e proposishon pa fasilitá e klientenan ku dokumentonan importante ku nan mester usa pa por hasi nan trabou mas efisiente i korekto posibel. E aklarashon (toelichting) riba Tarifa di Importashon ta un di e petishonnan ku ya Duana a honra. Por download esaki via e website nobo di Duana http://www.douane.cw 
E presentashon di Duana i kontakto ku Expediteurs i deklarantenan ta parti di e maneho di Duana pa komuniká mas konkreto, kla i direkto posibel i pa funshoná mas efisiente, efektivo, fásil i lihé na bienestar di klientenan, komunidat i personal. 
Duana ta supliká tur Expediteur, deklarante i usuario di Asycuda pa hasi bon uso di e website ku ta brinda tambe fasilidat di hasi pregunta Online. E website nobo ta hopi útil tambe pa kualke persona ku ke importá òf eksportá produkto òf merkansia.
Athunto potrèt di presentenan i hefe di Duana señor Ilario i señor Gaari, Teamleider di departamentu Financien Planning en Control durante su presentashon.

Potrèt  kortesia di fotógrafo di Amigoe – John Jairo Herrera