Celebrando 30 aña Banco Central di Aruba a organisa conferencia riba ‘FINTECH’ y Futuro di Placa

Celebrando 30 aña Banco Central di Aruba a organisa conferencia riba ‘FINTECH’ y Futuro di Placa

E sector di servicionan financiero ta pasando den un periodo sin precedente di transformacion tecnologico, innovacion, y digitalisacion sin precedente. Placa digital, pagonan via celular, y plataformanan comparti structuralmente ta cambiando nos ecosistema financiero di comercio cu impacto riba desaroyo economico.
Mas cu solamente un aplicacion, tecnologianan financiero (‘FINTECH’ na Ingles) ta consisti di un ecosistema digital cu ta ofrece diferente producto y servicio financiero. Esakinan ta inclui placa digital, paga cuenta via celular, ricibi credito di forma online, maneha inversion, y segura propiedad. Cu un balor di mas cu US$ 25 biyon mundialmente, y e potencial pa contribui na desaroyo economico, FINTECH ta un forsa pa conta cune.
Como parti di su celebracion di 30 aña aniversario, recientemente Banco Central di Aruba a organisa un conferencia riba e tema di FINTECH y futuro di placa.
Cu un programa intensivo consistiendo di diferente experto internacional y local, e conferencia a sa di capta imaginacion y inspira innovacion di un 200 ehecutivo cu a participa den diferente discusion informativo y educacional riba e tendencianan, tecnologianan y transformacion digital den servicionan financiero.
Expertonan cu a presenta na e conferencia ta inclui: Aron Dutta, Vicepresidente di IBM Blockchain Leader; Gabriel Abed, Director Ejecutivo di Bitt; Dustin Ling, Director di Citi Corporate & Investment Banking; Veronica Lange, Chief Innovation Officer di UBS; y Michiel van Doeveren, Asesor Principal di Sistemanan di Pago na De Nederlandsche Bank (DNB).
Durante e discurso di apertura oficial, Sra. Jane Semeleer, Presidente di BCA, a enfatisa cu “Digitalisacion extremo y conectividad global (via internet) ta transformando e modelonan di negoshi di banconan y di otro servicionan financiero, desafiando tambe otro institutonan importante manera banconan central cu ta regula mercadonan y emiti placa”.
Presidente di BCA a conclui cu colaboracion entre diferente instituto y cu compañia di FinTech ta esencial pa transforma servicionan financiero na Aruba: “e ta crucialmente importante pa nos crea un vision riba futuro bancario y di placa, pa asina cosecha e benificionan maximo di innovacion financiero pa henter e comunidad di Aruba”.
Riba website di BCA por lesa mas riba e speech di Presidente di BCA, Sra. Semeleer.

Banco Central di Aruba
Oranjestad
November 18, 2016