ENNIA CU FOYETO DI ZIKA YEN DI TIP DI PREVENCION Y DEN DIFERENTE IDIOMA
ENNIA CU FOYETO DI ZIKA YEN DI TIP DI PREVENCION Y DEN DIFERENTE IDIOMA
E siman aki ENNIA ta lansa su foyeto di Zika cu informacion actual y facil pa lesa di e virus di Zika, cu ta contene un gran cantidad di tip di prevencion. Por baha e foyeto colorido y bon structura aki, cu ta den cuatro idioma, for di e website di ENNIA. E ta wordo reparti gratis tambe na tur oficina di ENNIA riba e islanan tanten cu tin obtenibel.
“Como compania di aseguro ya pa algun aña caba, nos a expande nos servicio cu prevencion dor di duna informacion structura na comunidad,” asina Gilbert Martina, Senior Managing Director di ENNIA ta bisa. “Banda di nos seminarionan gratis di PreventNow, cu ta atrae centenares di participante tur aña, nos ta hopi activo tambe riba medionan social cu tur sorto di tip concreto di prevencion. Regularmente ENNIA ta emiti publicacionnan riba e topico di prevencion den forma di manual y foyeto pa informa nos ciudadanonan con pa actua ora di catastrofe, daño y peligro. Ademas di e manual popular riba Horcan, ENNIA awor ta lansa tambe pa tur habitante den Caribe Hulandes un foyeto preventivo riba Zika na Papiamento, Hulandes y Ingles.”
Martina: “E virus di Zika ta activo tambe den e area di Caribe y por asta causa daño grandi na e baby den bariga cerca muhernan na estado. Nos foyeto ta trata e causanan, diferente sintoma y consecuencia di e virus di Zika den mundo henter y specificamente den Caribe Hulandes. Como cu ainda no a desaroya un vacuna fiho, prevencion pa awor ta e miho remedi.” Pa e motibo aki e foyeto di prevencion di Zika, ta contene un gran cantidad di tip practico. Cu esaki ciudadanonan por tuma medida paden y pafo di nan cas pa preveni cu nan famia haya Zika.”
E foyeto di Zika ta gratuitamente obtenibel cerca ENNIA y por wordo baha tambe for di Internet via ennia.com/zika.
Pronto ENNIA lo pone un serie di les riba Zika disponibel pa enseñansa. E serie aki cu material di les moderno y actual ta destina pa e prome gruponan di Enseñansa Basico y por wordo baha for di Internet via ennia.com/zika.
