​SELEBRASHON DIA DI MÚSIKO I ARTISTA TA KONTINUÁ DJAWEPS AWOR TEMA SENTRAL MÚSIKA DI FIN DI AÑA EN PARTIKULAR AGUINALDO I GAITA

​SELEBRASHON DIA DI MÚSIKO I ARTISTA TA KONTINUÁ DJAWEPS AWOR TEMA SENTRAL MÚSIKA DI FIN DI AÑA EN PARTIKULAR AGUINALDO I GAITA

Kralendijk – En konekshon ku entre otro fiesta di Santa Cecilia patrono di músiko i artista, Sekshon Kultura Arte Literatura ‘SKAL’ tabatin un selebrashon kultural i festivo planiá pa a tuma lugá djadumingu último, pero ku mester a kansel’é debí na e situashon di wer. 
Awor e selebrashon ta tuma lugá djaweps 24 di novèmber binidero di 6or atardi pa 10or anochi riba plenchi di SKAL na Playa Pabou. 

Manera ta konosí e aña aki e selebrashon tin komo tema sentral músika di fin di aña en partikular Aguinaldo i Gaita. E programa ta konsistí di diskurso, informashon tokante historia di aguinaldo i gaita na Boneiru, animashon musikal di Jom Gaiteros i Krioyo Kids, tur esakinan kombiná ku un bríndis pa tur presente. 

SKAL ke pone énfasis di ta konsiente ku 22 di novèmber ta é fecha ofisial di fiesta di Santa Cecilia patrono di músiko i artistanan, solamente t’asina ku teniendo kuenta ku vários faktor entre otro logístiko ta pone ku no ta tur aña ta tene e selebrashon riba e fecha en kuestion. 
Ademas t’asina ku SKAL no ke mara su aktividat solamente na é fiesta religioso komo tal,sino tambe e ta unu pa medio di kual tur aña ta duna rekonosimentu na nos músiko i artistanan i tambe enfoká riba sierto komponente o género musikal artístiko den nos komunidat boneriano.             

Un i tur en partikular agrupashonnan musikal, músiko i artistanan en general ta kòrdialmente bonbiní djaweps awor 24 di novèmber di 6or atardi pa 9or anochi riba plenchi di SKAL na Playa Pabou, pa huntu selebrá dia di nos músiko i artistanan.