MÉNOS KRIMINALIDAT, KU APORTE DI SOAW
MÉNOS KRIMINALIDAT, KU APORTE DI SOAW
Ministerio di Desaroyo Sosial, Labor i Bienestar a realisá un logro importante riba e tereno di mediashon den
kuadro di su programa di gobernashon 2012-2016. Ta trata di trayecto di “mediashon entre ofensor i víktima” di
Ministerio Públiko, e asina yama Hustisia Sosial Restorativo.
Investigashonnan sientífiko a demonstrá ku e mediashon aki lo por trese 55% ménos residivismo. Tambe
víktimanan, ku partisipá den e proseso aki, lo sufri ménos largu di trauma pa motibu di un delito. E modelo aki
ta keda implementá mundialmente kaba, entre otro na diferente paisnan di Latino Amérika. Argentina ya a
realisá mas ku mil mediashon kaba.
Den e aserkamentu aki prioridat ta keda duna na intervenshon sosial. Den nos kaso e ta tuma lugá independiente
banda di e proseso hudisial. Tin paisnan ku ta mira den e aserkamentu optimista aki un direkshon, pa riba
tèrmino realisá por fin ku hustisia ta bira e último remedi di intervenshon.
Prome ku e prosedura penal e ofensor ta keda invitá pa tuma boluntariamente e responsabilidat pa restorá i
drecha lo kual a bai robes ku su viktima. E parti hustisia sosial/hudisial lo ta un forma di intervenshon pa
restorashon.
Tambe e énfasis ta riba e perspektiva di Ministerio SOAW esta e forsa propio di e famia i di e komunidat síviko
pa restoura danjo i emoshonan. Pues no ta e ofensor so ta pará sentral. E enfoke ta e relashonnan entre esnan
envolví. Ku e aserkamentu aki ta duna komunidat na lo kual sa keda bisa “it takes a village to raise a child”, i un
gobièrnu ku ke pa su komunidat mes tuma mas responsabilidat. Den e kaso aki tuma responsabilidat pa drecha
kos, pa restorashon.
Inovativo tambe ta ku kontrario na e proseso penal habri/publiko, esaki ta unu privá o será, den konfiansa ku
otro. Víktima, ofensor, famianan i konosínan ta haña oportunidat den un habitat priva i informal pa papia.
Palabranan klave ta: víktima, restorá huntu ku otro, konfiansa i responsabilidat i forsa komun.
E balor adishonal di SOAW den e aserkamentu inter-ministerial aki ta vishon inovativo, su supsidio riba e tereno
spesífiko aki, supervishon di kalidat i partisipashon den evaluashon.
Ministerio di Desaroyo Sosial, Labor i Bienestar, den estrecho koperashon ku e otro partnernan envolvi lo
kontinua na duna informashon tokante di e modelo di intervenshon aki.