MINISTERIO PUBLIKO TA INFORMA: Partisipante Top C bek SDKK
Info OM:
Partisipante Top C bek SDKK
Korte resientemente a disidí ku partisipante na Top C, F.S.M.B. (1996, Kòrsou) tin ku bai bek prisòn SDKK pa kaba sinta su 4 luna ku anteriormente el a risibí di forma kondishonal. B. a keda sentensia 15 òktober 2014 na un kastigu di prisòn di 12 luna di kual 8 luna kondishonal ku un periodo di pruebá di 2 aña. Durante su periodo di pruebá e mester a komportá su mes i kumpli ku tur kondishon di Jeugdreclassering. Lamentablemente e no a kumpli ku e kondishonnan tabata motibu pa Fiskal pa ehekutá e parti di kastigu kondishonal di 4 luna ku tabata kologá riba su kabes. E petishon a keda presentá na Korte ku a duna su aprobashon.
E proyekto Top C ‘Tur Wowo Riba Bo’ ta un proyekto di instansianan den e kadena hudisial i sektor sosial pa logra na baha kantidat di krímen, atrako i kiebro den outo i kas kometé dor di hóben, e asina yamá ‘high impact crimes’. Fokus di e proyekto ta pa guia e grupo Top C di 56 hóben pa medio di un plan di atendimiento. Ta duna nan guia, ta ofresé nan trabou i trato miéntras ku ta duna atenshon tambe na e ‘straf’. For di un bista preventivo ta duna guia tambe na nan rumannan hóben di e suheto na kas, pa evitá ku nan tambe ta drenta e sirkulo kriminal.
Prisòn tambe ta forma parti di e kadena hudisial ku ta partisipá den Top C.F.S.M.B. den prisòn ta ba risibí un trayekto pa pasa su dia ku kontenido (dagbesteding). Una bes den libertat lo sigui monitoriá F.S.M.B. dor di partnernan den Top C ku e meta prinsipal: evitá ku e ta bolbe kai den kriminalidat
