Domeinbeheer ta tuma medida kontra shushedat na Bestuurscollege bieu

Domeinbeheer ta tuma medida kontra shushedat na Bestuurscollege bieu

Willemstad- Algun siman pasá a saka algun publikashon tokante e shushedat ku tabatin den kurá di e edifisio bieu di Bestuurscollege aya na Concordiastraat den Punda. Mesora a hasi un yamada na instanshanan konserní pa tuma akshon kontra e situashon inaseptabel aki. Domeinbeheer komo e instansha di gobièrnu enkargá ku mantenshon di e edifisio aki, a tuma akshon pa limpia e dos diferente áreanan di e edifisio. Tambe a tuma medida mesora pa evitá ku esaki ta bolbe sosodé. Gobièrnu di Kòrsou ta hasi un súplika na habitantenan den e área pa duna un man dor di no tira shushi den kurá di Bestuurscollege bieu i pa mèldu na 0800-1919 ora tuma nota ku esaki ta sosodé.

Orígen di shushedat na Bestuurscollege bieu
Manera menshoná anteriormente, tabatin reklamo riba e kantidat grandi di shushi den kurá di Bestuurscollege bieu den Punda. E sushedat aki tabata konsistí di entre otro artíkulonan bieu, manera frishidèr, stof, i otro shushi en general, ku entre otro drogadiktonan ta karga i trese den e kurá.

Domeinbeheer tin un departamentu enkargá speshalmente ku mantenshon di edifisionan di gobièrnu. E departamentu aki ta monitoreá e edifisionan aki i tabata na altura di e situashon di Bestuurscollege bieu. Mirando e situashon agudo di e kantidat di shushi, Domeinbeheer a tuma e desishon pa laga hasi un limpiesa mesora.

Medidanan kontra e shushedat
Pa evitá ku e situashon aki ta ripití den futuro a laga drecha e porta di kurá i ser’é bon na yabi pa purba evitá ku hende ta drenta i tira shushi. Tambe ta trahando riba un maneho di mantenshon di edifisionan di gobièrnu. E maneho aki ta dil ku e tipo di problema aki, ya komo e ta un problemátika ku Domeinbeheer tin ku diferente edifisio di gobièrnu ku ta pará bashí pa tempu largu.
Parti di e maneho aki ta enserá e proposishon pa tin kontròl regular i lo hasi denunsia na polis pa ku personanan ku ta kulpabel di shusha edifisionan di gobièrnu.

E departamentu enkargá ku mantenshon di edifisionan di gobièrnu ya ta ehekutando partinan di e maneho aki. Ta hasiendo entre otro inventarisashon, registrashon i tasashon di tur e edifisionan. Den 2017 lo kontinuá i amplia mas riba e pasonan di e maneho aki.