Bo Banko Amigu ta sigui kompartí Ban selebr’é 100! 100!

Bo Banko Amigu ta sigui kompartí Ban selebr’é 100! 100!

WILLEMSTAD- Ta 2016 i Maduro & Curiel’s Bank ta bai kumpli 100 aña dia 16 di desèmber. Pa por sigui selebrá i kompartí e logro grandi aki ku su klientenan i komunidat di Kòrsou, Bo Banko Amigu ta organisá un tremendo ben-ben riba djadumingu 18 di desèmber den areanan di Punda i Otrobanda. Esaki ta un manera úniko pa akshonistanan, Tim di Maneho i empleadonan di Maduro & Curiel’s Bank gradisí tur kliente i komunidat pa nan lealtat i konfiansa.

E selebrashon lo start 10or di mainta i ta terminá 8or di anochi ku diferente presentashon riba 5 diferente podium. Tambe lo tin 2 area unda lo tin teras, tènt i trùk di kuminda i bar unda tur hende presente lo por kumpra nan kosnan di kome i bebe na un super bon preis. Esakinan lo ta ubiká na Riffort (Otrabanda) i na Plasa Gobernador (Punda).
Den area di Punda lo tin un “Art Street” i “MCB Museum” ku tur hende por bishitá durante di dia. Kayanan di Punda i den area di Brionplein i Riffort lo ta yená ku diferente aktuashon di saksofonista, show akrobátiko, estatuanan bibu, brasband, steelband, Mariachi, Kwarteto, muchu pa menshoná. Pa esnan ku ta deseá na kanta nan legria, lo tin un bùs di karaoke presente den area di Punda. Lo tin dos area pa mucha ; “Lito 1” i “Lito 2”; un na Porta di Willemstad (area di Punda) i un na Molenplein (area di Otrobanda). Na tur e dos areanan aki lo tin bouncer, weganan pa mucha i presentashon di e mago Tom Presti.

Presentashonnan den area di Punda:
Podium “Doria dòs Plaka” na Cola Debrot Plein: aki lo ta area di músika “Jazzy” ku e siguiente line-up: Gedion Chandler & co, Perfect Four, Ronchi Matthew & co i Konkie Hallmeyer & co.
Podium “Dies Plaka” Wilhelmina Plein: músika di Pop/Urban ku Gino Coelho & co, Aemy & co, Charming Bastards, Hershel & Friends, Junior Tecla & co, Area 51 i DJ. Krokzz
Podium “Florin” na Plasa Jojo Correa: músika folklóriko di Grupo Serenada, Hòben Positivo i Aktivo, MCB Band i Los Paranderos.

Presentashonnan den area di Otrobanda:
Podium “Un Fuèrte” na Riffort: músika kontemporaneo di Junior Orchestra, Angelitos, presentashonnan di Drazans, Strea Chikí, Fina Dance Art i Norman Moron & co.
Podium “Seisuria” na Brionplein: músika Latino-Karibense di Forsa Dos, ERA, Dreams i Gentz.

Pa pone e chèri riba e bolo pa 6.30 di anochi Randal Corsen lo tin un presentashon úniko ku su BIG BAND unda nan lo presentá e 14 kansionnan di nos artistanan lokal ku a hasi impakto na Kòrsou durante di e 100 añanan di eksistensia di Bo Banko Amigu. Despues di esaki públiko presente ta invitá pa ban den un biahe di 100 aña di Maduro & Curiel’s Bank ku un show espektakular.

Maduro & Curiel’s Bank, Bo Banko Amigu ta sumamente orguyoso di su logro i ta konsiente ku su klientenan i komunidat di Kòrsou a hunga un ròl masha importante den esaki. Pa e rason importante aki komunidat di Kòrsou kompletu ta invitá pa biní Punda i Otrobanda dia 18 di desèmber próksimo pa huntu nos selebr’e 100! 100! Pa mas informashon bishitá nos página di Facebook MCB Rumbo pa 100.

5 di desèmber 2016
_mg_3589

_mg_3643

_mg_3652

mcb-management-centennial-coordinators-evento-randal-corsen

This site uses Akismet to reduce spam. Learn how your comment data is processed.

error: Content is protected !!
%d bloggers like this: