Cuerpo Policial ta celebra aniversario di dos Polis ehemplar Boy Boezem y Tico de Mey a cumpli hunto 70 aña di servicio

December 8, 2016 REDAKSHON

Cuerpo Policial ta celebra aniversario di dos Polis ehemplar Boy Boezem y Tico de Mey a cumpli hunto 70 aña di servicio Durante un ceremonia special recientemente, Sub-Inspector Primera Clase, Boy Boezem y Engelberto “Tico” de Mey a wordo honra cada un cu 35 aña di servicio ehemplar como Polis di Cuerpo di Polis Aruba (KPA).
Sub-Inspector Primera Clase Boy Boezem a drenta servicio di KPA tempo cu Aruba tabata forma parti ainda di Antiyas Hulandes – dia 1 di december, 1981. Durante su carera como Polis el a bisti diferente petchi, cuminsando na 1983 trahando na e servicio uniforma na Playa. “Esey ta e warda bieu unda awe Renaissance Hotel ta situa. Eynan mi a traha te na 1987,” e ta bisa cu un poco nostalgia.
Dia 1 di juni a transferi’e pa e departamento di recherche cu ainda tabata localisa na unda awe ta Renaissance Hotel. “Despues nos a bay Wilhelminastraat na e mesun aña ey y mi a keda den e funcion di recherche te cu awe,” Boezem ta bisa cu orguyo.
Durante e transcurso di añanan Boy a sirbi como recherche na Playa, Noord… “y a traha un tempo cu RST,” e ta bisa y desde aña 2012 e ta eherce su funcion como recherche na Santa Cruz.
“E añanan a bula. Mi a traha cu hopi coleganan cu awe no tey mas, tin di nan ta gosando di nan pensioen. Mi ta gradecido na cada un cu mi a siña for di dje, mi no ta menciona nomber pa no lubida niun,” e ta refleha. “Asina e añanan ta bula y ya a yega 35 aniversario di servicio. Awor nos ta enfoca riba salud y spera cu poder di Dios mi lo tin e salud, cu ta loke ta mas importante, pa nos yega 40,” Boy ta laga sa.
Hunto cu Sub Inspector Boezem otro Polis cu a wordo honra pa su 35 aña di servicio den e encuentro ameno tabata Englberto (Tico) de Mey cu ta trahando como lider di proyecto criminalidad organisa. “Mi tin 18 aña ta traha eynan y en total 35 aña den servicio di KPA,” de Mey ta bisa cu un cierto siguransa den su bos.

De Mey a cuminsa su carera como polis trahando surveillance na San Nicolas cu e la haci pa 10 aña… “despues mi a bay Santa Cruz unda mi a keda dos aña y e resto mi a traha na Noord unda cu pa e ultimo 18 añanan mi ta eherciendo mi funcion como polis na e departamento di crimen organisa. En total 35 aña.”
E ta sigui splica cu si compara antes cu awor hopi a cambia den e sistemanan di crimen. Ta haya hopi mas crimennan cometi pa hobennan. “Door cu tecnologia ta duna nan tur informacion y ta siñanan pa bay den sistemanan criminal mas avansa. Si wak bon e edad di criminalnan a baha hopi. Antes hendenan mayor di edad tabata comete crimennan y leu aleu bo por a haya un hoben ta comete crimen, pero awor bo ta haya cu crimen no tin edad mas. Esnan hoben, menor di edad,ta esunnan cu ta comete crimen. Mirando loke KPA ta haciendo mi ta wak cu nos ta bezig ta tuma medidanan pa evita cierto crimennan, pero e ta bayendo den un tendenciahopi alarmante. Esey mi por bisa sigur, e ta agrega hopi preocupa.
“Awe nos tin dos empleado cu ta cumpli 35 aña di servicio den Cuerpo di Polis Aruba,” Korps Chef Sr. Dolfi Richardson ta bisa. Mi a conoce ambos na departamento di recherche, dus nan ta coleganan cu hopi conocemento riba e experticio aki. Mi tin cu bisa tabata un mainta hopi ameno hunto cu e famianan cu tambe tabata presente.
Korps Chef Sr. Dolfi Richardson ta agrega cu na ocasionnan asina e ta gusta enfatisa riba famia, pasobra ta famia ta sostene nos coleganan door di momentonan dificil. Mane bo sa e trabao di polis no ta un trabao facil. E dos coleganan aki tin un trayectoria hopi largo den cuerpo policial. “P’esey 35 aña no ta mane ‘het ziet niks’ y esaki ta e motibo cu awe nos ta gradici nos dos coleganan, pasobra ambos a traha cu alma y cuerpo pa nan korps y manera nos hefe a comunica awe mainta riba tur dos e por conta semper y semper nan ta duna nan sosten y e amor cu nan tin pa nan trabao. Esey ta algo formidabel,” e ta bisa un poco emociona.
“P’esey nos a tuma e tempo awe pa gradici nan pa tur loke nan ta haci, e servicio cu nan ta brinda na nos comunidad y na nomber di comunidad y Cuerpo Policial kier a gradici nan y felicita nan cu e logro grandi aki,” e ta conclui.