Selebrá fin di aña, pero keda alerta: Banco di Caribe ku algun konseho valioso tokante protekshon di bo kuenta e fin di aña aki

December 13, 2016 REDAKSHON

WILLEMSTAD- DEC/2016; Luna di desèmber ta luna di ‘kompra’. Hopi ta esnan ku ta shòp èkstra durante fin di aña miéntras otronan ta realisá biahenan familiar, pasando e temporada den eksterior. Banco di Caribe den forma preventivo ta konsientisá nos komunidat i spesialmente su klientenan riba e fenómeno di ‘skimming’ i ‘harvesting’.

“Nos deseo ta pa tur hende selebrá fin di aña, bai di biahe sin prekupashon i sin lamentá despues. Esaki ta posibel ora ku tuma tur prekoushon nesesario. Ta nos máksimo intenshon pa protehé nos klientenan di tur akshon froudulento ku por presentá. Manera nos tur sá, ‘skimming’ i ‘harvesting’ ta fenómenonan mundial ku lamentablemente ta sosodé na Kòrsou tambe. ‘Skimming’ ta tuma lugá ora ku e informashon di tarhetanan bankario di e kliente keda hòrta dor di kriminalnan. E parti di ‘skimming’ ta tuma lugá hopi mas promé ku ‘harvesting’. Nos ta papia di ‘harvesting’ na momento ku kriminalnan usa e informashon hòrta aki pa lanta sèn di kuenta di e kliente. Pues mihó nos prevení ku lamentá”, esaki di akuerdo ku Sr. Fons Simon di Banco di Caribe.

Algun Konseho di BdC pa kliente:
Pa por protehé bo tarheta di débito i krédito e banko ta duna su klientenan komo konseho pa kambia nan PIN regularmente. Klientenan di Banco di Caribe tin e fasilidat pa por kambia nan PIN di nan tarhetnan di débito i krédito na tur nos ATMnan. Ora di paga, tapa bo man ora bo ta marka bo PIN. Si bo mester entregá e tarheta, keda ten’é na bista. Ademas Banco di Caribe ta konsehá su klientenan pa usa e ATMnan di Banco di Caribe mes pa mas seguridat. Tin mas ku 28 ATM stratégikamente ubiká riba nos isla, pues fásilmente por yega na un di nan pa por lanta plaka si esaki ta nesesario. Manera semper, klientenan por akudí na kualke filial di Banco di Caribe pa transferensianan bankario.

Si pa kualke motibu un kliente ripará ku e no por lanta sèn, esaki ta nifiká ku Banco di Caribe mes, den su afan pa protehé e kliente a blòkia e tarheta. E kliente e or’ei mester akudí mas lihé posibel na un filial di Banco di Caribe pa kambia su kódigo sekreto. “Ta importante pa klientenan ta konsiente ku e situashon di ‘skimming’ i ‘harvesting’ ta tuma lugá na Kòrsou. Nos ta spera ku nos klientenan duna oído na nos konsehonan, e akshon preventivo di Banco di Caribe riba e fenómenonan aki ta na benefisio di klientenan mes, naturalmente nos tin nan mihó interes na pechu”, di e forma aki Sr. Fons Simon, CEO di Banco di Caribe ta terminá.
_fonssimon1