Orashon djamars 20 di desèmber 2016
Orashon djamars 20 di desèmber 2016
Den e di seis luna ku Elisabèt tabata na estado, Dios a manda angel Gabriel bai Nazarèt, un siudat na Galilea, pa bishitá un sierto bírgen ku tabata komprometé pa kasa ku Hosé, un desendiente di David. E mucha muhé tabata yama Maria. E angel a drenta serka Maria i bis’é: ‘Mi ta saludá bo! Señor a faboresé bo ku su grasia. E ta ku bo!’ Maria a bira tur aríbabou ora el a tende e palabranan akí i a puntra su mes ta kiko e saludo akí ta nifiká. Pero e angel a bis’é: ‘No spanta, Maria, pasobra bo a kai na agrado di Dios. Mira, lo bo sali na estado i duna lus na un yu hòmber ku bo mester yama Hesus. Lo E ta un gran hòmber i nan lo yam’É “Yu di Altísimo”. Señor Dios lo dun’É trono di su antepasado David; te den eternidat lo E ta rei di e desendientenan di Yakob i na su reino lo no tin fin.’ Maria a puntra e angel: ‘Kon esaki por sosodé? Pasobra mi ta bírgen.’ E ora ei e angel a kontest’é: ‘Spiritu Santu lo baha riba bo i poder di Altísimo lo tapa bo manera un sombra. P’esei e yu ku lo bo trese na mundu lo ta santu i nan lo yam’é “Yu di Dios”. Bo ta kòrda Elisabèt, bo famia? Maske tabatin papiá ku e no por haña yu, tòg den su behes el a sali na estado, anto awor e ta den su di seis luna kaba! Pasobra pa Dios nada no ta imposibel.’ E ora ei Maria a kontestá: ‘Ata sirbidó di Señor; laga sosodé ku mi loke bo a bisa.’ I e angel a kita bai for di dje.
Lukas 1:26-38