Ministerio di Salubridat, Medio Ambiente i Naturalesa ta konsehá kon… KOME I BEBE NA MIDI I SALÚ DURANTE DIANAN DI FIESTA

ministerio-di-salubridat-publiko-medio-ambiente-i-naturalesa-kontakto

Ministerio di Salubridat, Medio Ambiente i Naturalesa ta konsehá kon… KOME I BEBE NA MIDI I SALÚ DURANTE DIANAN DI FIESTA

Willemstad – Dianan di fiesta ta yegando i fuera ku ta un temporada ku nos ta rekordá nasementu di Hesus e ta tambe un temporada ku nos gusta disfrutá di platonan sabroso. Pero den e temporada aki tambe nos mester skohe loke nos ta kome i bebe konsientemente, pa asina kuida e salú i naturalmente e peso. Departamentu di Dieta i Nutrishon di Asuntunan di Salubridat Públiko (ántes GGD) tin algun tep práktiko i balioso pa bo sperando ku nan por ta di gran ayudo den e temporada aki.

KOMEMENTU AFO
Si bo ta invitá na un fiesta òf komementu sigui e rekomendashonnan aki:
– No bai stoma bashí, kome algu liviano promé bo bai manera un salada por ehèmpel;
– Ora di sirbi kuminda pidi un tayó mas chikí, si esaki no ta posibel trata na yena mitar di bo tayó so ku kos di kome;
– Skohe kumindanan i pasa palos ku no ta hasá;
– Skohe mas tantu kumindanan fresku manera fruta i bèrdura i skohe pa kome ménos aros, pasta, batata;
– Kome solamente si bo tin apetit, no paso bo ta mira;
– Na momentu ku bo sintibo ta yenando no sigui kome;
– Si ta sirbi kos di kome òf bebe kontinuamente skip un par di biaha. Siña bisa no, danki;
– Si ta parti mas ku un postre skohe solamente un sorto;
– Si ta bebe bebida alkohóliko skohe pa bebe mitar kùp òf glas enbes di un kompletamente yená i bebe poko poko;
– Si ta bebe bebida alkohóliko yena e kùp ku hopi eis promé basha e bebida òf pidi e bibida ku hopi eis;
– No bai kas ku “left- over”;
– Alternativanan pa bebida alkohóliko i riku na suku: club soda ku lamunchi òf djus, limonada diet, biña òf serbes sin alkohòl.

KOME NA RESTORANT
Ora bo ta bai kome na restorant tambe tin posibilidat nan ku bo por adaptá bo kuminda na bo eskoho:
– Bo por informá adelantá kon e kuminda ta wòrdu prepará i si ta hasi eksepshon;
– Por pidi sous apart enbes di riba e kuminda esaki ta konta tantu pa karni òf salada;
– Enbes di pidi postre por pidi te òf kòfi;
– Por pidi bo karni di grill kombiná ku salada so;
– Enbes di un bebida alkohóliko por pidi un “soda water” ku lamunchi òf ice-tea;
– Si bo ke disfrutá di un bon postre sòru pa bo kuminda prinsipal ta abou na vèt.

TENE KUENTA KU ESAKI TAMBE
– Ta importante pa bo sigui hasi ehersisio i moveshon durante dianan di fiesta. Esaki ta yuda pa stimulá bo metabolismo i kima èxtra kaloria.
– Kòrda bebe sufisiente awa, 1-2 liter di awa pa dia (8 glas di awa).
– Evitá na kome anochi lat ya ku e nutrientenen lo keda warda den forma di vèt den e kurpa .
– Tene kuenta ku si riba un dia bo a kome di mas pa e siguiente dia bo kome ménos pa balansa bo komementu.

Ministerio di Salubridat, Medio Ambiente i Naturalesa ta deseábo felis dianan di fiesta pero semper kome i bebe na midi i di un forma saludabel.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: