SELIKOR TA INVERTÍ DEN EKIPO PA OPTIMALISÁ LIMPIESA DEN SENTRO DI SUIDAT I PA AMPLIA KAPASIDAT NA TRANSBORDO KORAL SPECHT
SELIKOR TA INVERTÍ DEN EKIPO PA OPTIMALISÁ LIMPIESA DEN SENTRO DI SUIDAT I PA AMPLIA KAPASIDAT NA TRANSBORDO KORAL SPECHT
Djaluna 19 di dezèmber, Selikor NV a tene un konferensha di prensa pa duna informashon na komunidat, via di prensa lokal, riba diferente invershon den ekipo ku e kompania a realisá resientemente. A tene e konferensha di prensa den pleno sentro di suidat di forma ku prensa por a tuma nota personalmente di e ekiponan atkerí i mira nan den operashon. Direktor General di Selikor sr. Wesley Kook, kompañá pa sra. Jeanine Constancia-Kook representando Minister di Salubridat Públiko, Medioambiente i Naturalesa a hiba palabra na e okashon akí.
Mashin di pèrs móbil
Pa amplia kapasidat di Transbordo Koral Specht Selikor a invertí den un mashin di pèrs móbil. Ku kompra di e mashin akí a ekspandé e kapasidat di shushi ku Selikor por atendé kuné na Koral Specht i asina optimalisá e servisio na Transbordo. E mashin lo bini adishonal na e kapasidat di e silonan ku tin aktualmente. E mashin di pèrs akí ta unu práktiko, riba su propio chasis ku wil ku por wòrdu pegá na un trailer i transportá di un sitio pa otro sitio. Lo por transportá e mashin akí por ehèmpel den barionan na momento di tene akshon di limpiesa. E pèrs móbil akí su kompartimentu di shushi ta di 50m3. E mashin tin e kapasidat di pèrs e shushi te ku 5 biaha i pues por karga un máksimo di 250m3 di shushi. Durante di e konferensha di prensa invitadonan por a presensia e mashin akí den funshon. Tabata habitantenan di e bario di Rif i besindario kendenan a tuma e inisiativa pa limpia dos kas inhabitá den e bario en kuestion i e shushi ku nan a rekohé a wòrdu depositá den e mashin di pèrs.
Mashin di bari
Otro ekiponan ku Selikor a atkerí ta 2 mashin di bari chikí nobo ku a bini for di Italia di e fábrika Dulevo. E mashinnan di bari akí entretantu ta wòrdu usá pa trabounan di mantenshon den sentro di suidat i besindario. E mashinnan di bari akí ta mas kompakto ku loke e kompania tabatin te ku awor, nifikando ku lo ta muchu mas fásil pa maniobrá den hanchinan smal di sentro di suidat pa hasi limpiesa.
Trùk di shushi pa rekohé shushi
Mas aleu sr. Kook a duna un bista riba otro invershon den ekiponan ku Selikor a atkerí durante aña 2016. Ta trata akí di entre otro tres trùk di shushi nobo pa fortifiká e flota di trùk i optimalisá e servisio di rekohé shushi di kas. Ku atkisishon di e trùknan akí por a nota klaramente un alivio pa loke ta trata e kantidat di ekiponan disponibel i tambe stabilidat den e servisio di rekohementu di shushi di kas.
Selikor NV ta keda invertí den ekiponan nobo pa asina brinda pueblo di Kòrsou e servisio ku e meresé. Nos ta keda hasi nos máksimo esfuerso pa un Kòrsou limpi i bunita kaminda habitante ta sinti nan mes orguyoso di e pèrla den Karibe i nos turistanan lo pasa e bon palabra pa mas turista bin bishitá nos isla.
Durante di e enkuentro akí tambe sr. Wesley Kook a hasi entrega ofisial di e relato anual 2015 di Selikor na representante di Minister Victorina. E relato anual ta konsistí di un relato finansiero ku ya a keda presentá i aprobá pa e hunta di komisario di Selikor anteriormente. Finalmente sr. Kook den su kalidat di direktor general di Selikor NV a hasi uzo di e oportunidat pa ekspresá palabranan di gratitut den direkshon di e Minister saliente pa su temporada komo Minister enkargá ku Selikor NV i a hasi entrega di un regalo na esaki.
