Gezaghebber Rijna sumamente kontentu ku eskudo nobo DESVELO DI ESKUDO NOBO NA PASSANGRAHAN

Gezaghebber Rijna sumamente kontentu ku eskudo nobo DESVELO DI ESKUDO NOBO NA PASSANGRAHAN

Kralendijk – Djamars, 20 di desèmber, Gezaghebber Rijna a desvelá un arte nobo di e eskudo di Boneiru ku tin kologá den Passangrahan. E eskudo ta un símbolo importante pa e pueblo di Boneiru i sr. Frans Booi tabata na kabes di e tim ku e diseñá esaki na aña 1986. Pa e renobashon di eskudo griffie a tuma kontakto ku sr. Booi pa e mes sòru pa e renobashon di e eskudo p a dun’é e realse ku e mester tin den e sala di reunion na edifisio di Passangrahan. Sr. Booi a opta pa regalá gobièrnu un eskudo kompletamente nobo. Durante e presentashon di sr. Booi el a splika e nifikashon di kada parti di e eskudo. E korona ta e símbolo ku ta indiká ku Boneiru ta forma parti di e Reino. E ta e korona di Duke ku mayoria provinsia na Hulanda ta usa. E timon ta duna rekonosementu na e boneriano ku ta nabegá. E kompas i strea ku ta aparesé tambe riba e bandera di Boneiru ta simbolisá e determinashon di e kurso ku Boneiru ke bai aden. E seis punta di e strea ta representá e seis barionan tradishonal di Boneiru. E koló blou di e eskudo ta e unidat di shelu i laman. Ta e koló di e laman Karibe ku ta konektá nos ku e restu di mundu ku ta hunga un ròl importante den ekonomia.