​Elsa Rozendal: Huramentashon komo Minister di Enseñansa!

​Elsa Rozendal: Huramentashon komo Minister di Enseñansa!

Amigunan,
Mi por imaginá mi ku ta na e momentunan aki, abo i bo sernan kerí ta preparando pa selebrá e fiesta di Pasku di Nansementu.  Ta un fiesta ku ta yena abo mi ta kere, meskos ku ami, ku e mihó sintimentunan.  Mi deseo mas grandi ta pa e Pasku aki nos selebrá e fiesta aki reflehando riba kiko kada un di nos por hasi, pa hasi esnan ku nos ta toka diariamente aun mas felis. For di seno di mi hogar mi ke deseá boso tur un felis Pasku.

Mi ke hasi uso di e oportunidat pa tòg aklará e rason di mi ousensha na huramentashon komo Minister ayera djabièrne serka su Ekselensha Gobernadó.  Mi por komprondé ku serka bo tambe pregunta por a surgi na momentu ku ayera mi no a huramentá komo boso Minister di Enseñansa manera tur hende a spera. Ta bon mi kuminsá na enfatisá ku mi NO tin niun klase di problema ku partido MAN ni niun integrante di partido. Mi ta hopi kontentu i orgusyoso di por ta forma parti di partido MAN i mi deseo i esfuersonan ta pa mi por keda forma parti di Partido MAN pa hopi tempu mas.
Ta asina ku djawèps anochi 7or a yama un reunion den kua a duna miembronan di Parlamento, ku mester a huramentá komo Minister, di konosé ku tin un situashon nobo ku a surgi kaminda e Parlamentario ku huramentá komo Minister, no por fungi komo Parlamentario na mes momentu pa e pròksimo 90 dianan.

E miembronan ku mester a huramentá djabièrne dia 23 di desèmber 2016 a hiba deliberashon tokante di e situashon, posibel senarionan ku lo por presentá i implikashonnan ku por trese kuné na momentu ku 8 miembro di Parlamento di e koalishon tuma retiro parew komo Parlamentario. 

A diskutí tambe e posibilidat di huramentá den “tranches” esta grupo grupo. 
Ta bon pa aklará ku na momentu ku un Parlamentario huramentá komo Minister outimátikamente e ta haña su retiro komo miembro di Parlamento. Esaki lo a nifiká ku koalishon lo a keda ku representashon di tres miembro di Parlamento di koalishon (esta señora Giselle Mc William, señora Marylin Alcala-Walle i señor Humphrey Davelaar) te ora yama un reunion públiko pa por trata e kartanan ku kredenshal òf “geloofsbrieven” di e miembronan nobo ku mester huramentá komo Parlamentario. 
Pa frakshon di MAN esaki lo a nifiká ku si, señor Hensley Koeiman, señor Kenneth Gijsbertha i mi persona huramentá den un tiru, MAN (komo frakshon di 4) lo a keda respresentá pa solamente un miembro den Parlamento, esta señora Mc William. 

Ta bin aserka ku señora Mc William lo no ta na Kòrsou pa e temporada benidero, ku ta buta ku aunke ku Parlamento ta den reces, anto algu urgente surgi, MAN lo no tabata tin ni un miembro pa representá frakshon di MAN den Parlamento. Esaki na mi pareser no ta responsabel!

P’esei, despues di deliberashon ku liderasgo di partido, mi a opta pa mi huramentá asina ku señora Mc William ta bèk na Kòrsou i/òf señor Hensley Koeiman i señor Kenneth Gijsbertha keda remplasá pa dos miembro nobo ku mester drenta Parlamento. 
Mi tin pleno komprenshon ku na e momentunan aki tantu nos Lider komo señor Gijsbertha mester a huramentá pa instalá, ku orguyo, e promé Kabinete Koeiman formalmente. Esaki ku señor Koeiman komo kabes di e Gobièrnu i señor Gijsbertha komo Minister di Finansas. Di e forma aki señor Gijsbertha por finalisá su tarea komo formadó ofisialmente.
Mirando ku ayera 8 minister, minister plenipotensario i minister plenipotensario suplente a huramentá i e echo ku 1 minister so no a huramentá ainda, NO ta stroba e proseso ni e Gobièrnu pa kuminsá i dal bai sirbi pueblo manera pueblo ta eksigí di su Gobièrnu. 
Danki pa a permití mi aklará un ke otro na bo.  
Un biaha mas mi sinsero bon deseonan pa e dianan di fiesta.

This site uses Akismet to reduce spam. Learn how your comment data is processed.

error: Content is protected !!
%d bloggers like this: