ORANJESTAD ARUBA: Mensahe di anja ! BENNY NISBET (PPA): “ PPA ACTIVO DURANTE ANJA 2016 CU NOS OPINION, NOS CRITICA, NOS PREUCUPACION PERO TAMBE CU SOLUCCION Y VISION !!”

Mensahe di anja ! BENNY NISBET (PPA): “ PPA ACTIVO DURANTE ANJA 2016 CU NOS OPINION, NOS CRITICA, NOS PREUCUPACION PERO TAMBE CU SOLUCCION Y VISION !!”

Cumpliendo cu nos tradiccion PPA ta emiti nos ‘mensahe’ pa final di 2016.
PPA a worde funda pa sr. Juan E. Yrausquin q.e.p.d. na anja 1949 locual ta nifica cu na oktober ultimo PPA a cumpli 67 anja di existencia como organisacion politico. PPA mientras tanto ta un organisacion politico cu historia, experiencia y un vista ‘scerpi’ riba majoria topico.
Anja 2016 PPA a reuni un 44 vez den nos directiva y Conseho di Partido !! PPA tin algun comission encarga cu nos futuro programa cual ta reuni un 2 vez pa luna cual ta un 24 vez pa anja ! PPA a duna 131 declaracion ‘por escrito’ na prensa den cual un variacion di topico a worde trata e.o. Upgrader y su impacto (?), Economia di Aruba e.o. Turismo e.o. all inclusive, cruisetourism etc. Oranjestad Quo Vadis, Futuro di San Nicolas, Aru-parking, Criminalidad, Cambio di Clima, Rising Sea Levels, Ensenansa Prioridad no 1, Mocion y consensus di Desiree…, Containerhaven pa Barcadera, Medio Ambiente, Dump na Parkietenbos, etc etc…. PPA a critica funcionamento di gab Mike Eman en particular e crisis Financiero, Economico, hedging, impacto social no suficiente, pero PPA a critica tambe funcionamento di Staten y kada fraccion ora PPA sinti cu esaki tabata justifica….
PPA a accentua nos vision pa nos desaroyo Economico cu accento riba construccion di un Aruba World Trade Center, vision di PPA pa cu diversificacion di nos Turismo, vision di PPA pa cu desaroyo di San Nicolas esta ‘San Nicolas, Our Caribbean Town’, vision di PPA pa cu desaroyo na Barcadera etc etc. Na mes momento PPA tabatatin nos programa semanal Radial na Radio Hit 94 cual ta tur diaranzon atardi di 5.30 pa 6.0r p.m y cual programa ta worde ripiti TUR diahuebs anochi pa 11.30…!! Tambe PPA y varios miembro ta activo riba ‘social media’ e.o. ‘Facebook’. PPA su representacion a participa den un 10 programa di entrevista sea na radio( Interes di Pueblo, Programa Conversia cu Rocky of na Television programa …… Tambe PPA a duna varios declaracion na radio. Esaki ta demonstra claramente e participacion activo di PPA durante anja 2016 y nos meta di sigui sirbi nos pais Aruba.

Algun topico cu PPA kier a accentua di nan desaroyo na 2016 ta lo sigiente:
1. E acuerdo pa e ‘transformacion’ di e refineria den un Upgrader …NO a ricibi e atencion necesario durante tratamento den parlamento. Un gobierno NO transparente …pero cu un parlamento y un oposicion ja ‘mara’ na un pensamento a hasi cu parlamento NO por a sirbi bienestar general di pueblo debidamente cu e acuerdo aki. Pesey PPA ta visualisa hopi dolor financiero pero tambe dolor riba salud publico den e proximo 25 anja cu e acuerdo aki lo por ta vigente cu nos pais Aruba !!
2. Diversificacion di nos Turismo !! Cu tanto gobierno ta gaba cu cierto cifra di e jegada nos turista tanto ‘stay-over’ of cruise tourism, PPA ta di opinion cu locual tabata necesario durante e ultimo ocho cu accento e ultimo cuatro anja tabata un ‘diversificacion’ di nos producto turistico y un expancion di nos mercado turistico. PPA ta di opinion cu e actual gobierno a faya barbaramente dentro di e tarea aki y cu e futuro gobernacion cu pueblo lo mester elehi lo mester hanja e ‘tarea’ cu ta di transedental importancia pa futuro di turismo di nos pais !!
3. Oranjestad nos capital Quo Vadis …?? E actual gobierno a inverti masha hopi fondo publico den Oranjestad !! Pero visiblemente nan a faya den duna Oranjestad un miho futuro commercial. A faya cu introduccion di e ‘street-trolley’ (Vision di PPA !!) y a faya den presentacion di un ‘vision propio di gobierno’ kiko lo ta futuro commercial/turistico di Oranjestad y con esaki lo worde ‘mercadea’ den futuro ?. E introduccion di un Aru-parking na unda a inicia cobra pueblo pa parkeer combina cu ‘klemmento’ di propiedad di pueblo a crea un rabia enorme den pueblo. Un rabia cu te awe gobierno no kier realisa con profundo e rabia aki ta. Miles y miles di ciudadano no ta bishita ‘centro di Oranjestad’ pa nan no core risico di hanja un klem pasobra f. 75,– ta casi 5% di un salario minimo !! Y cu gasto pa nan bai cu bo auto esaki ta bira f. 225,– ta nifica 15% di un salario minimo of un pensioen!! Majoria hende no por biba si nan hanja mas gasto derrepiente asina !! PPA ta e unico cu a propone pone un final na Aru-parking y crea un Aru-guide & Service den su lugar !!
4. “San Nicolas, Our Caribbean Town’ ….Gab Mike Eman no kier realisa e profundidad di e vision aki. A critica nos vision pa anjas ..pa despues purba tumele over sin usa su titulo real…pero ta ejecuta varios projecto saca for di e vision di PPA… esta un Carnival Village/Museum esta drecha nos watertoren, drecha Nicolaas Store, drecha Uncle Louis Store, pinta riba murayanan ….pero PPA su vision esaki ta ensera pintura di historia di Aruba/San Nicolas y con San Nicolas a crece. E pintura actual ta bunita pero varios di nan nos no por comprende e ‘laso’ entre e pintura y e historia di San Nicolas. San Nicolas ta un ciudad arubiano cu a crece cu un impacto caribense enorme. E desaroyo aki a larga un impacto social, un impacto cultural, un impacto historico…. tur esaki ta forma e producto di ‘San Nicolas Our Caribbean Town’ cu mester worde projecta pa e por worde mercadea y bendi como parti di producto turistico di Aruba.
PPA ta convenci cu esaki lo tin un impacto grandi pero nos ta mes convenci cu esnan cu ta encarga cu e maneho cu ta worde ejecuta….ta carese di e conocemento aki.
UN ARUBA WORLD TRADE CENTER !
PPA ta un organisacion cu semper a projecta ‘vision’ grandi pa nos pais iniciando cu ‘vision pa desaroyo di nos turismo’. Durante 2016 PPA a projecta nos vision pa locual den concepto di PPA lo por desaroya su mes den un di dos of di tres pilar economico PPA ta jamele un ‘Aruba World Trade Center’ combina cu un Universidad International cu accento na e facultad di ‘Idioma y IT’ combina cu dos ‘business hotels’. E sitio unda PPA ta desea pa un projecto asina worde construi ta parti di e tereno cu a bin liber awor cu e containerhaven a muda pa Barcadera..!

FUTURO DI E REFINERIA Y E TERENO INDUSTRIAL ??
Mirando e inseguridad cu ta reina rond di uso di e tereno industrial pa Citgo Aruba NV y specialmente e inseguridad financiero PPA ta mantene nos vision di ultimo eleccion 2013.
PPA ta di opinion cu un bon parti di e tereno industrial aki lo por worde destina pa ‘Shipbuilding & Shipservices’ den e haf natural di San Nicolas. PPA ta kere den un Containerhaven como HUB pa container destina pa otro pais cu no por ricibi e asina jama ‘post panama vessels’ cu tin un profundidad di 16 meter. Na Aruba e unico haf cu tin un parti cu ta cumpli cu e profundidad ey ta e haf di San Nicolas. PPA su vision ta tene cuenta tambe cu un parti commercial di San Nicolas lo por crece bai pa e haf y PPA ta mantene un parti ainda pa otro desaroyo industrial manera ‘steel companies’ etc…
PPA kier a gradici e medianan cu a duna PPA participacion durante anja 2016 door di publica nos opinion al respecto…!! PPA kier a haci un apelacion publico na otro media cu a ‘boycotea’ nos door di no publica pa habri nan media pa nos organisacion politico cu tin tur intencion di sigui sirbi nos pais durante e anja nos dilanti esta 2017. Danki di curazon na tur !!
PPA kier a manda palabranan di un feliz final di 2016 cu bao di musica di dande e anja nobo 2017 hasi su entrada …. Cu Dios drama bendicion riba nos pueblo cu nos pueblo den su totalidad lo sa di uni den sirbi un solo meta ‘bienestar general’ di nos pais. Un feliz anja 2017 !!
Aruba, 27 di December 2016
Lider Politico
Benny Nisbet