Aruba Notisia Polisial 9 di yanüari 2017
Algun hòmber kanando lomba sunú ku bate di beisbòl den man direkshon nort.
SCP a dirigí patruya na Caya Ernesto Petrona, na altura di e santana, kaminda probablemente tabatin algun hòmber ta kana ku bate di beisbòl den nan man.
Polis a kontrolá den bisendario, pero no a topa ku nan.
Tambe polisnan a papia ku un pèrsona di seguridat di Valero Ponton, i esaki a deklará ku e no a mira niun hende
SCP a wòrdu poné na altura.
=======================
Riba òrdu di SCP, patruya a bai “le petit café”, pa un kaso di destrukshon.
Na e sitio polisnan a papia ku un di e vigilantenan.
E vigilante a deklará ku un grupo a bula riba dak di e restorant i a destruí un plachi di zim i tambe un parti di e kabana.
A konsehá e vigilante pa pone e doño na altura pa e por hasi denunsia na rechèrche.
SCP a wòrdu poné na altura.
=======================
Durante kontròl CP a dirigí nan mes na Piedraplat pa un intento di ladronisia.
Na e sitio polisnan a topa ku e hòmber di nòmber F.
I el a deklará ku riba 9 di yanüari 2017, el a yega na su outo pa banda di 07:30 i el a ripará ku deskonosínan a destruí e bentana dilanti na banda drechi di e outo.
F ta sigui deklará ku e ta kere ku deskonosínan lo ke a bai ku e outo.
E outo ta di marka KIA tipo RIO di kolor shinishi.
A tuma deklarashon.
=======================
SCP a dirigí patruya na Rooi Afo pa un kaso di pleitu entre bisiña pa motibu di kabritu.
Na e sitio polisnan a papia ku e hòmber N.,kende a deklará ku e kabritunan di su bisiña lo a bolbe drenta su kurá i a kome 2 di su matanan.
N ta sigui bisa ku esaki no ta e promé bia i ku el a kansa di e situashon.
En konekshon ku esaki a bai papia ku e doño di e kabritunan di nòmber L.
El a deklará ku enbèrdat e kabritunan ta di dje i ku nan a sali for di nan kurá sin ku e tabata sa.
E ta bisa ku N tambe ta forma problema i ku e tin di tene su kurá será.
A splika L bon klá ku no ta obligashon pa sera porta di kurá.
Pero ku e sí ta obligá di kana huntu ku su bestianan di moda ku esakinan no ta kousa daño na otronan.
A sali na klá tambe ku e kabritunan no tabata marká i ku e ta kore riesgo ku un hende por hòrtanan.
N a deklará ku e no ke e kabritunan den su kurá. I ku e próksimo bia L lo tin ku paga daño.
A intermediá entre e dosnan i si algu bolbe pasa den futuro, nan a keda di tene kontakto ku otro telefónikamente.
SCP a wordu poné na altura di e kaso.
=======================
A drenta un yamada na warda di polis, ku na Pepe Nacho lo tin un hòmber stòmburachi drumí na suela.
Na e sitio polisnan a topa ku e hòmber bon konosí pa polisnan komo “Preke”, kende tabata drumí abou dilanti di e edifisio di Pepe Nacho.
For di promé kontakto ku e hòmber, polisnan a konstatá ku e tabata stòmburachi.
Esaki tabata bisto dor di su wowonan kòrá, e no por a para stabíl i tambe dor ku e tabata papia lenga bruhá.
E sospechoso di nòmber M, a wòrdu detené i hibá na warda di polis Santa Cruz, pa despues present’é dilanti di HOVJ.
=======================