Site icon KIKO TA PASANDO NOTISIA I INFORMASHON

Promé konseho di federashon di UNSEBAKO pa 2017

Advertisements

Promé konseho di federashon di UNSEBAKO pa 2017
Union Sentronan di Bario Kòrsou (UNSEBAKO) djasabra último a tene na su sede na sentro di bario Souax, su promé reunion di konseho di federashon pa aña 2017. Durante e reunion aki, ku a konta ku asistensia di praktikamente tur sentro di bario, UNSEBAKO a evaluá aña 2016 i a kaba di formalisá su plannan pa aña 2017.
Sentronan di bario tabata hopi satisfecho ku e manera ku UNSEBAKO a funshoná den 2016 i e echo ku bou di tur sirkumstansia e sentronan a keda yuda, sostené i motivá otro. Komo e puntonan mas fuerte den 2016 sentronan di bario a menshoná e echo ku UNSEBAKO a sigui krese i tambe e komunikashon interno entre direktiva di UNSEBAKO i direktiva di sentronan di bario.
Igualmente sentronan a demostra hopi satisfakshon ku e profilashon di UNSEBAKO pa medio di su presentashon entre otro den e programa “Bario pa bario t’esei ta Kòrsou” .
Un di e desaroyonan mas positivo den 2016 tabata e echo ku na diferente sentro di bario e kantidat di dirigente i boluntario a krese.

Pa loke ta e trato di gobièrnu i Fundashon Sefba pa ku sentronan di bario, lamentablemente den 2016 tampoko no tabatin niun adelanto. Den kurso di aña e problemanan interno na Sefba a eskalá i e minister bou di kua Sefba ta kai, esta e minister di Asuntunan di Desaroyo Sosial i Labor mes a deklará públikamente ku durante añanan ku a pasa Sefba no a kumpli ku e meta ku ela keda lantá p’e.
E funshonamentu defisiente aki di Sefba a stroba un mihó desaroyo di sentronan di bario i di bario.

Sinseramente sentronan di bario ta spera ku den 2017 lo bin kambio den e maneho di gobièrnu i Fundashon Sefba, na bienestar i progreso di bario i sentronan di bario di Kòrsou. Pendiente di esaki, e dirigentenan di e sentronan di bario i direktiva di UNSEBAKO ta keda motivá i desidido pa sigui ku nan trabou na interes di nan bario en partikular i di Kòrsou en general.

Riba e potrètnan:
Potrèt 1 – 2)
Un bista di e dirigentenan di sentronan bario presente na e promé reunion di UNSEBAKO di 2017.
Potrèt 3) Presidente di UNSEBAKO sr. Juny Sluis dirigiendo su mes durante e reunion, na dirigentenan di e diferente sentronan di bario.

Exit mobile version