Minister Koeiman ta tene su promé enkuentro ofisial ku personal di ministerio pa Enseñansa, Siensia, Kultura i Deporte
Minister Koeiman ta tene su promé enkuentro ofisial ku personal di ministerio pa Enseñansa, Siensia, Kultura i Deporte
WILLEMSTAD – Djaluna mainta 23 di yanüari 2017, Minister Hensley Koeiman a tene su promé enkuentro ofisial ku personal di e Ministerio pa Enseñansa, Siensia, Kultura i Deporte (M.E.S.K.D). Despues ku Sra. Susan Larmonie-van Heydoorn, Direktor di Maneho pa e ministerio a habri e enkuentro ku palabranan di bon biní i a introdusí e personanan responsabel pa e diferente departamentonan prinsipal el a pasa palabra pa Minister Ing. Hensley Koeiman. Minister Koeiman na su turno a ekspresá su satisfakshon pa sera konosí ofisialmente ku e personal kompletu. Mas aleu Minister Koeiman a enfatisá riba e echo ku su persona ta minister pa Enseñansa, Siensia, Kultura i Deporte i no minister interino i ku el a tuma un luna pa orientá pa haña un bon bista i fiha un direkshon dinámiko pa ehekushon di un maneho pa ESKD.
Minister Koeiman a mustra riba e importansia di enseñansa pa desaroyo i bienestar di kada siudadano di nos komunidat. El a bisa ku den su vishon i maneho lo pone atenshon na desaroyo di e siudadano no solamente riba enseñansa kognitivo pero ku mesun atenshon na desaroyo di e ser humano riba su talentonan riba otro aspektonan.
Alabes Minister Koeiman a enfoká riba e echo ku no opstante ku e denominashon enseñansa ta bini hopi dilanti, su vishon i maneho ta ku Siensia, Kultura i Deporte lo haña e atenshon ku nan meresé dentro di e fasilidatnan ku tin disponibel.
Mas aleu Minister Koeiman a bisa ku e ta konsiente ku e lo no por realisá tur kos su so i ku e ta kere masha hopi den trabou komo tim. El a bisa ku e ta hopi konsiente ku e ministerio tin profeshonalnan hopi kapasitá i ta konvensí ku kada unu individual i trahando komo tim lo duna nan máksimo pa logra e ophetivo i retonan ku tin di atendé kuné pa pone enseñansa riba e nivel ku nos tur ta deseá.
Teniendo e vishon di tim den su maneho na haltu, Minister Koeiman a instalá un tim di eksperto ku lo mester duna sosten na su persona i e tim di maneho di e Ministerio. E personanan aki el a introdusi ofisialmente kende nan ta: Sr. Frank Quirindongo, profeshonal riba tereno di Enseñansa, Siensia i Sosiologia, Sr. Yubi Evertsz, eksperto riba tereno di enseñansa, Sra. Mirieta Lourens-de Lanoy, profeshonal riba tereno di Maneho di Rekurso Humano, i sra. Shama Ajodhia, register accountant, kende lo asesorá minister riba tereno di finansa i e departamentu finansiero.
E tim di maneho di ministerio mes ta konsistí di Sr. Henri Vijber, komo Sekretario General interino, Sra. Susan Larmonie-van Heydoorn, Direktor di Maneho, Sra. Lizette Sambo-Velder, direktor di Sektor di Kultura i Deporte i Sra. Zulaijka Pinedo-Brandao, Direktor Interino pa Sektor di Enseñansa i Siensia (UoW).
A klousura e enkuentro ku un oportunidat pa e personal presente hasi pregunta na Minister Koeiman. Esaki tabata un inisio di un seri di aktividat ku tin riba agènda pa e siman aki i simannan benidero di kua na su debido tempu lo tene e personal i komunidat informá di dje.