Debate tokante edukashon familiar na Kòrsou UNICEF a presentá na mei 2013 un raportahe tokante derechinan di mucha den e paisnan di Reino Hulandes.

Debate tokante edukashon familiar na Kòrsou

UNICEF a presentá na mei 2013 un raportahe tokante derechinan di mucha den e paisnan di Reino Hulandes. Den e reportahe aki a trese dilanti ku Reino Hulandes lo mester dediká mas atenshon na Derechinan di mucha i e nesesidat di traha huntu a keda suprayá. Durante di IPKO (reunion Inter Parlamentario) tambe a pidi pa pone mas atenshon na e derechinan di mucha i durante e Konferensha di Reino riba 2 di aprel 2014 na Aruba e koperashon entre e paisnan di Reino a keda tratá. A lanta un TaskForce Derechinan di mucha, ku e tarea prisipal di promové koperashon enter e paisnan di Reino, ku e meta prinsipal pa drecha situashon di derechinan di mucha den Reino. Pa asina kumpli ku un di e derechinan di mucha ku ta “Tur mucha tin derechi riba un bon niñes i hubentut”.

E Taskforce Derechi di mucha ta konsistí di miembronan di tur pais di Reino. Anualmente ta organisá un konferensha pa trata aspektonan ku por kontribuí na mehorá Derechinan di mucha den kada pais di Reino. E aña aki e konferensha ta trata e importansha di edukashon pa kombatí maltrato. Durante e konferensha aki, ku lo tuma lugá na Boneiru di 6-8 di mart, kada pais lo mester presentá nan definishon i vishon tokante edukashon familiar.
Sektor di Famia i Hubentut di Ministerio SOAW ta representá Kòrsou den e Taskforce i a nombra Sra. Margareth (Peggy) Grootens komo embahador di edukashon pa Kòrsou.
Pa yega na un definishon i vishon tur e paisnan den Reino ta organisá algun debate tokante edukashon familiar. E debatenan na Kòrsou ta karga e nòmber:”Ban Papia Edukashon”. Sektor Famia i Hubentut ta enkargá ku organisashon di e debate na Kòrsou.
Metanan di e debate di edukashon familiar ta:
• Inisia kombersashon i diskushon tokante edukashon bou di edukadonan, profeshonalnan i mayornan
• Fortalesé sosten soshal den barionan
• Kompilá informashon i konosementu kon pa trese edukadónan den kontakto ku otro
• Normalisá papiamentu i diskushon riba edukashon
• Duna un impulso pa nashonalmente papia riba edukashon familiar

SOAW ta invitá komunidat di Kòrsou pa duna su kontribushon dor partisipá aktivamente na e debatenan. Edukadónan profeshonal i mayornan lo por debatí ku otro den un panel bou di guia di un lider riba e tema di edukashon familiar positivo i seif. Lo debati’segun regla stipulá adelantá i lo diskutí riba algun ponensia. Partisipantenan por trese dilanti i kompartí ku otro nan opinion i nan punto di bista.
Adrès pa bishitante: Tauber-building, Prinsenstraat # 86 | Adrès pa korespondensia: Wolkstraat #15 | Willemstad, Kòrsou T.: +(599) 9 434 0300 | F.: +(599) 9 461-0521 | http://www.gobiernu.cw
E resultado di e debatenan lo keda kompilá dor di un büro eksterno. Lo traha un vishon di edukashon Familiar pa Kòrsou huntu ku un montahe di sine pa presentá durante e konferensha di Taskforce na Boneiru.
E debatenan ta planiá pa tuma lugá dia 14 i 15 di febrüari próksimo na Sentro di bario Otrobanda i Sentro di bario Montaña. Entrada ta liber. Personanan ku ta interesá pa partisipá mester registrá komo ku e kantidat di lugánan ta limitá. Interesadonan por manda un mail na: papiaedukashon@gmail.com, Partisipantenan na e debate lo risibí kontesta via di un mail di konfirmashon huntu ku un invitashon ofisial.