Kampionatonan Infantil di Ahedres U8 i U10

Federashon di Ahedres Korsou (FEDAKO) ku mes antusiamo di semper ta anunsia na ahedresistanan hoben, nan mayornan i demas amantenan di e deporte noble di ahedres ku e tempu a yega pa tene e kampionatonan anual di ahedres pa gruponan infantil.

E aña aki Trupial Inn Hotèl lo ta patrosinado i anfitrion pa e kategorianan U8 i U10 i lo ta prome biaha ku FEDAKO ta organisa e kampionatonan pa kategorianan U8 i U10 den gruponan separa. Den pasado tur e muchanan bou di 14 aña a hunga den un solo grupo segun e sistema Suiso i na final tabata determina kua partisipantenan tabata miho den e diferente kategorianan di edat. Awor ku kada grupo apart, FEDAKO ta stimula i motiva esnan di edat mas chiki i duna nan mas oportunidat pa kompeti i krese.
Lo permiti e miho 8 finalistanan di e kampionato U8 pa partisipa na e kampionato di U10 i tambe e miho 8 finalistanan di U10 pa partisipa nan e kampionato U12 ku lo tuma luga durante luna di mart. Tempu pa pensa pa gruponan infantil lo ta 30 minut pa kada mucha durante kada wega i no ta nesesario pa hasi anotashon di wega.
Lo tin diferente premio pa e partisipantenan i tambe posibilidat pa klasifika pa un kampionato di un grupo di mas edat.
Pues djasabra 11 di februari ta spera e ahedresistanan U8 na Hotèl Trupial Inn i djasabra 25 di februari ta spera e muchanan kategoria U10.
Partisipantenan mester ta presente 09:30 ‘or na Trupial Inn pa registra i inskripshon ta kosta fl. 5,– pa kada un di e kompetensianan.
Un invitashon ta bai na un i tur pa bin mira e muchanan den akshon. Pa mas informashon por yama 512 0007 of manda un WhatsApp.