Ekstradishon di Rietwijk, Koeiman i Felecia un hecho

Info OM:

Ekstradishon di Rietwijk, Koeiman i Felecia un hecho

 

Awe mèrdia,  djárason 15 di febrüari 2017, a ekstraditá Ramphis “Ronchi” Rietwijk (1965), Rogelio “Greg” Koeiman (1968) i Gilbertico “Kalala” Felesia (1978) pa Estádos Unídos. Nan a bandoná Kòrsou (Felecia i Rietwijk) i Sint Maarten (Koeiman) riba un vuelo spesial di outoridatnan Merikano.

E ekstradishon di Koeiman, Rietwijk i Felesia konosé un historial largu. E proseso a keda inisiá na 2013 na momentu ku Estádos Unídos a pidi detenshon i ekstradishon di tur tres persona relashoná ku trafikashon di droga. Outoridatnan hudisial di Estádos Unídos ta akusá e trio di trafikashon di por lo ménos 2 kargamentu for di Philipsburg pa Estádos Unídos. Den luna di yüli 2013 US District Court for the Southern District of New York a ordená nan detenshon.

E proseso di ekstradishon a konosé un kaminda hopi largu. For di 2013 te dia di awe. Entre otro durante henter e proseso tabata tin diferente kaso den Korte via Hof i via huisio sumario penal I sivil pa trata na para e proseso. Tur a resultá envano. Durante e periodo aki a trata e ekstradishon asta na dos okashon den Korte Supremo (Hoge Raad) di Reino Ulandes na Den Haag, e órgano ku ultimo palabra riba tereno di lei penal i mas haltu den Reino. Promé esei a sosedé riba petishon abogado i despues riba petishon di Ministerio Públiko (OM). Dia 15 di novèmber 2016 Hoge Raad a disidí definitivamente ku e ekstradishon ta hustifiká i akseptabel. 

 

Finalmente, dia 16 di yanüari 2017 Gobernador di Kòrsou i Gobernador di Sint Maarten a tuma e desishon definitivo pa ekstradishon.

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: