Gobernador mester respetá deseo di mayoria

Gobernador mester respetá deseo di mayoria

Direktiva di Movementu Futuro Kòrsou (MFK) a tuma nota di e intrankilidat ku ta biba bou di nos komunidat pa ku e situashon polítiko ku nos ta eksperensiando na e momentunan aki.

Posishon di direktiva di MFK pa loke ta trata elekshon ta, ku MFK ta kla pa partisipá na e kontienda elektoral. MFK tin un manual di elekshon ku nos a elaborá durante di e tres elekshonnan ku nos organisashon a partisipá na dje, kaminda nos organisashon tin tur loke nos mester hasi i tene kuenta kuné ora tin un proseso elektoral.

Den mesun rosea nos ta konsiente ku elekshon na e momentonan aki ta kosta sèn i tambe ku pueblo di Kòrsou no ta bon sirbi ku un elekshon den apénas 5 luna, despues di e último elekshon. Mas ainda ora tin un mayoria ku ta dispuesto pa forma un gobièrnu.

Elekshon di dia 28 di aprel próksimo a wòrdu yama debí ku gobernador di Kòrsou a aktua di forma inkorekto i no a tene kuenta ku deseo di un mayoria den Staten. Esaki ta un deskuido i eror grave di parti di e gabinete di gobernador.

Pa e motibunan ariba menshoná direktiva di MFK a instruí nos lider polítiko pa huntu ku e sobra miembronan di Parlamento ku ta forma e mayoria pa hasi tur loke legalmente ta na nan alkanse pa para e elekshon di dia 28 di aprel próksimo. Miéntras ku direktiva di MFK pendiente di un desishon final, sin miedu i sin ningun otro interes lo traha riba e proseso pa MFK partisipá na elekshon di dia 28 di aprel si ta nesesario.

E komparashon ku hopi ta trata na trese dilanti ku e situashon aktual ta igual ku esun di 2012, ta kompletamente robes. Artíkulo 53 di nos Areglo di Estado a wòrdu apliká dor di gabinete Schotte promé ku dos parlamentarionan a yega na un akuerdo nobo ku un mayoria pa remplasá gabinete Schotte, ku ya tabata den funshon pa 2 aña kaba.

Den e situashon aktual un gabinete demishonario i ku un periodo di gobernashon di apénas 50 dia ta apliká artíkulo 53 di nos Areglo di Estado i sin ningun motivashon den e “Landsbesluit” i gobernador sin tene kuenta ku interes general i presensia di un mayoria ta firma e “Landsbesluit” aki.

Konkluyendo;

– MFK pa loke ta trata e parti organisatorio, nos ta kla pa bai elekshon.
– Pa direktiva di MFK gobernador a aktua di forma indebido i sin respetá deseo di mayoria
– Teniendo na kuenta ku tin un mayoria i ku nos a kaba di sali di un elekshon kaminda pueblo a kaba di ekspresá su mes, nos a instruí nos lider polítiko pa hasi tur loke legalmente ta su enkargo pa sea para òf hala e fecha di elekshon pa e di dos parti di aña.

Na nòmber di Direktiva di MFK

Sithree A. van Heydoorn
Sekretario General