Karta sra. Marilyn Alcala-Walle : akshon inmediato pa garantisá seguridat inmediato den Parlamento!

Na: Presidente di Parlamento di Curaçao
Sr. Gilmar Pisas
Wilhelminaplein 4
Presente.

Willemstad, 23 di febrüari 2017..

Tópiko: akshon inmediato pa garantisá seguridat inmediato den Parlamento!

Apresiabel sr. Presidente,

Mi ke bolbe ripití ku nos di frakshon di PAR ta kondená e aktitut bochornoso, repudiabel i rechasabel di un miembro di Parlamento pa ku un otro miembro.

Alabes mi ke informá bu ku awe tardi a resultá kon peligroso ta pa un grupo ta sintá ku lomba pa porta i kon traishonero un atake personal tras di lomba por ta. Ainda mi tin doló.

Hamas di mi bida mi a pensa ku algu di e karakter aki por sosodé den mi bista den un Parlamento.

Mi NO por drumi. Mi NO tin soño. Mi ta puntra mi mes kon un hende por hasi algu asin’aki. E sla tabata realmente duru. Inkreibel. Mi tin miedu ku sierto gruponan ta fomentá agresividat ( i mi a eksperensiá esaki riba 4 di yanüari 2017 tambe, tambe ora e grupo bishitante tabata wòrdu stimulá den e sala di bishita ariba pa sostené desòrdu) i ku despues situashon ta bira inkontrolabel i peligroso pa esnan mas vulnerabel. I tambe peligrando seguridat alabes pa e kolaboradornan di Griffie. Kua ehèmpel a keda duná awe den e sala ku mester ta unu prestigioso i ehemplar?

Na nòmber di frakshon di PAR mi ke tende di bo persona komo Presidente di Parlamento kua ta e akshonnan eksaktamente ku bo ta bai tuma pa garantisá nos seguridat. Pasombra abo sa meskos ku ami di kua huki e fermentashon di desòrdu ta bini.

Awe tardi mas ku nunka mi a sinti mi sumamente INKOMODO ku mi asiento nobo den Parlamento. I bo mes tambe a eksperensiá e momento di traishon.

Mi ta keda den espera di bo reakshon i e medidanan di seguridat inmediato ku mester wòrdu tumá.

Atentamente,

Drs. Marilyn Alcalá-Wallé
Lider di Frakshon di Partido Alternativa Real (PAR)

Na:   Presidente di Parlamento di Kòrsou

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: