Empresario local Dennis van Daatselaar:  Ta haciendo un tremendo trabou den henter centro di ciudad y nos ta spera cu e ta continua

Empresario local Dennis van Daatselaar:

Ta haciendo un tremendo trabou den henter centro di ciudad y nos ta spera cu e ta continua
ORANJESTAD – Mescos cu el a cana den Wilhelminastraat un dia y el a wak e potencial den un edificio na benta, asina Dennis van Daatselaar ta spera cu mas comerciante y empresario pone nan confiansa y inversion den un negoshi na Oranjestad. E ta contento cu e desaroyo di ultimo añanan y ta spera cu esakinan por continua. Ta keda na tur hende pa traha hunto y asina por bay na e siguiente nivel di actividad economico.

Como propietario di e restaurantnan Wilhelmina y Maroc cu a habri algun tempo atras den centro di ciudad, e Chef y empresario ta ser considera como un stakeholder den e plannan di revitalisacion di Oranjestad. Como tal, e tabata entre e invitadonan di Oficina di Innovacion pa e presentacion duna pa Jessica Goldman y Joseph Furst di Goldman Properties y Wynwood BID siman pasa.

Van Daatselaar a confesa cu for di tempo cu el a yega Aruba na 1988, el a haya Oranjestad atractivo, pero e oportunidad ideal a presenta ora cu ex edificio di Brenchie’s a bin na benta. E locacion bunita dilanti di Rietveld Academie, e plaza nobo y banda di Lagoen, ta haci’e hopi encantador. Clientenan ta reaccionando positivamente, contrario na loke otro persona tabata conseha e Chef.

“Hende a bisa mi cu mi ta loco di bay Oranjestad, pero clientenan ta bin na e restaurant, e ta bayendo bon y awo mi tin mas cos cu mi kier haci,” asina van Daatselaar ta bisa. Su boluntad, banda di e renobacionnan haci den centro di ciudad y con ta busca conocemento y experiencia for di hendenan manera Goldman Properties, ta duna e Chef hopi entusiasmo pa bay na e siguiente nivel.

“Nos mester bin hunto y yuda otro pa haci’e mas atractivo pa bin den centro di ciudad. Tur hende ta wardando, pero bo mester djis haci’e,” van Daatselaar ta bisa. “Den henter centro di ciudad nan ta haciendo un tremendo trabou, bo ta wak e mehoracionnan durante ultimo par di aña y mi ta spera esey por continua,” el a expresa refiriendo na e esfuerzonan di parti di Gabinete Mike Eman I y II pa renobacion y revitalisacion di henter Oranjestad.

Goldman Properties tabata na Aruba pa conoce nos ciudad capital y su alrededornan, sinta cu Minister President Eman y Minister mr. drs. Arends di Asuntonan Economico pa bin cu ideanan y tambe pa duna presentacion na sector financiero, comercial y cultural di nos isla. E obhetivo ta pa ripiti na Oranjestad loke e compania a yega di haci den pasado cu Soho na New York y,  mas recientemente, na Wynwood, Miami.