DUANA KÒRSOU KU SU PROPIO PÁGINA DI FACEBOOK

DUANA KÒRSOU KU SU PROPIO PÁGINA DI FACEBOOK

Willemstad – Duana Kòrsou ta sigui progresá den inovashon i den e kaso aki ta bai duna mas informashon di su servisionan na komunidat atraves di e página di Facebook Douane Curaçao. Entrante djaluna 20 di mart Duana su Facebook página ta live. E página aki ta sirbi tambe pa promové uso di e website di Duana. Na kada ‘Post’ Duana lo referí na e artíkulo relevante riba su website, via un link, pa informashon adishonal. E tekstonan riba nos Facebook página lo ta na Papiamentu i pronto na Ingles tambe.
Regularmente Duana lo publiká artíkulonan di interes general i susesonan ku Duana ta eksperensiá durante su kòntròl riba importashon i eksportashon. Duana lo publiká artíkulonan tokante entre otro informashonnan pa biahero, di mudansa, di e programa Asycuda World (sistema digital pa hasi deklarashon), pa aplikashon online di diferente pèrmit, kompra via internet, manda pakete pa un partikular, deklarashon di entrada i importashon, deklarashon di salida i eksportashon i di eksonerashon di impuesto riba importashon manera preskribí den lei.
Na e página aki tin tambe kondishonnan deskribí pa usuario tene kuenta kuné. Duana ta stimulá tur persona ku ke hasi Duana un pregunta di un tópiko spesífiko ku a publiká òf tin kualke otro pregunta pa subi su website http://www.douane.cw i skohe e página Contact (contactformulier) i yena e pregunta konserní. Lo trata di kontestá tur pregunta denter di 2 x 24 ora, naturalmente dependé e peso i komplikashon di e pregunta.
Duana ta invitá tur persona ku ke biaha, importá òf eksportá produkto òf ke manda un pakete pa un famia òf konosí pa hasi uso di su Facebook página Douane Curaçao òf/i bishitá su website pa mas informashon.

This site uses Akismet to reduce spam. Learn how your comment data is processed.

%d bloggers like this: