Profesor Ralph Belton di e Universidad di e Districtro di Columbia, a bishita Aruba pa sondea e posibilidad di “Agricultura Urbano” den centro di Oranjestad

March 21, 2017 REDAKSHON

Oranjestad,– Algun ana pasa, Minister Mike Eman, a firma un MOU cu e Universidad di e Districtro di Columbia na Washington DC pa e motibo cu e Universidad tin un facultad hopi renombra na Merca pa e diferente modelonan den systemanan di Agricultura sustenibel pero den centro di ciudad y areanan urbano. E idea aki ta cuadra cu e visión y deseo di e Gobierno di Aruba, cual ta produci den tur areanan posibel pa crea un seguridad di cuminda como tambe oportunidad di trabou den e ramo aki.

Na October 2015, un delegación chikito di Santa Rosa, encabeza pa e Directora, Sra. Nathalie Maduro, a biaha pa Washington DC y a hasi un bishita extensivo den cual a será conoci cu e diferente areanan di estudio den e ramo aki y tambe a bishita e diferente projectonan urbano den cual e maneho di Agricultura urbano ya ta wordo implementa exitosamente.

Recientemente, Profesor Ralph Belton, encarga cu e Facultad di Arquitectura y kende porcierto ta naci tambe na Aruba, a bishita Aruba, pa bin hasi un sondeo di kiko ta e diferente oportunidad nan cu Aruba ta ofrece pa establece projectonan di Agricultura urbano den centro di Oranjestad y otro areanan na Aruba caminda cu normalmente no tin custumber pa produci pero cu tin un concentración halto di habitante of usarionan di e localidadnan, cu semper lo por beneficia di e producciónan aki.

Awendia di systemanan manera Hydroponics, Aquaponics, Aeroponic, Vertical farming, Rooftop farming etc cual ta systemanan moderno den cual por produci un cantidad halto di producto pero sin interferí cu e desaroyo di e espacio. Por inclui tambe systemanan di energía renovable mediante solar panels of windchargers, serando e circulo completo pa locual ta sustenibilidad di henter e projecto.

Di acuerdo cu Sra. Maduro, Directora di Santa Rosa, “Nos mester cuminsa studia e posibilidad di e introducion di systemanan moderniza cu por juda nos Aruba jega na un seguridad di cuminda a largo plazo, a pesar di tur e retonan cu tereno y awa cu nos por tin. Esakinan ta systemanan nobo y cu lo rekeri cambio den nos manera di planifica, sin embargo, si tur hende reconoce e balor agrega na e introducion di e tipo di modelonan aki den nan projectonan, no solamente lo nos conta cu eficionan cubri cu areanan berde cu lo juda mantene e calor den e edificio mas abou, pero tambe lo por ofrece un cantidad di productonan fresco pa consumo y otro oportunidad di negoshi pa esnan interesa di hasi uso di e espacionan aki pa produci.”

Durante su bishita na Aruba, Profesor Belton a duna un presentación na Minister President, Sr. mr. Mike Eman conhuntamente cu Minister Ing. Benny Sevinger. Tambe a reuni cu e ejectivonan di Santa Rosa y Infra Team pa “brainstorm” encuanto di e posibel solución y remodelación di un edificio den centro di Oranjestad cu lo por bay bira e “edificio modelo” como introducion di e concepto aki na Aruba. Prof. Belton a hasi un bishita tambe na Santa Rosa, caminda ela duna un presentación encuanto di e henter e systema y con esaki lo por beneficia Agricultura den futuro na Aruba.

Pa asegura cu e ta comparti su conocemento cu nos studiantenan, Prof. Belton a duna un charla na e studiantenan di EPI (Sector Technico) caminda cu ela splica encuanto di e concepto di Agricultura Urbano mediante e uso di espacio y edificionan urbano. Tambe ela splica encuanto di e Universidad mes y kiko esaki lo por ofrece na esanan cu ta desea di bay sigi nan estudio den e ramo aki. Esaki sigur ta un di e metanan principal di Santa Rosa, pa juda concientiza y motiva nos studiantenan pa escohe un estudio avanza den e technologianan moderno den Agricultura.

Otro bishitanan cu Prof. Belton a hasi durante su estadia, tabata serca di Sr. Glenn Thode encarga cu Universidad di Aruba, caminda cu a combersa ariba e diferente oportunidad nan con e dos Universidadnan por traha hunto den futuro, den cuadro di e planes nan cu tin pa establece un “Green Faculty” na Universidad di Aruba. Tambe ela reuni cu Sra. Astrid Britten y Sr. Ronny Alders na Biblioteca Nacional pa hana mas información encuanto di e “Green Educational Symposium. Por ultimo Prof. Belton a reuni cu Sr. Frank Hoevertsz y su team na Utilities NV caminda cu a combersa referente e diferente systemanan moderno den Agricultura y uso di awa recycla. A toca e tema tambe uso di “waiste” cu por juda pa crea energía y compost cual awendia ta just wordo kima na dump.

E siguiente paso awor lo ta, pa Profesor Belton traha un raport di e diferente oportunidad cu por a senala y conhuntamente cu su team di coleganan experto y studiantenan di e Universidad, lo hasi un estudio y crea un plan lo wordo entrega na Gobierno di Aruba, creando asina e di prome edifico completamente sustenibel cu por produci usando energía natural y cu por juda pa motiva studiantenan y especialmente nos entrepeneurs nan local pa considera e tipo di projectonan aki como un posibel negoshi.

Adhunto por aprecia algún potret di e bishita di Profesor Belton na Aruba. Danki na tur cu a coopera cu Santa Rosa Aruba cu nan participación y cooperacion durante e bishita di Prof. Belton.

“ Sostene nos cultura, practica Cria, Pesca y Agricultura”