Site icon KIKO TA PASANDO NOTISIA I INFORMASHON

KOMUNIKADO DI GOBERNADO DI KÒRSOU 

Advertisements

 

Komunikado di Prensa
WILLEMSTAD – 

Gobernador di Kòrsou, Su Ekselensia Lucille George-Wout, ta di opinion ku ta di gran importansia pa desaroyo di e sistema demokrátiko di Kòrsou, ku elekshon di dia 28 di aprel 2017 ta tuma lugá. Kòrsou ta un estado di derecho demokrátiko kaminda mester respetá Konstitushon di Kòrsou. Parlamento ta mará tambe na e prinsipionan di e estado di derecho demokrátiko, manera esei ta konsagrá den Konstitushon. Konsiderando e importansia fundamental di e outorisashon di gobièrnu pa disolvé Parlamento i den lus di ‘peso i kontrapeso’ (checks en balances’), e desishon pa disolushon ku e aktual gobièrnu-interino ta bini kuné, ta afektá gravemente seguridat hurídiko i bon gobernashon. Pa tal motibu Gobernador a presentá e Dekreto Nashonal (Landsbesluit) di dia 27 di mart 2017, kaminda ta kanselá elekshon na gobièrnu di Reino. 

Dia 27 di mart gobièrnu-interino Pisas a entregá Gobernador di Kòrsou un proyekto di un Dekreto Nashonal (ontwerp-Landsbesluit) pa ratifikashon, ku ta proponé pa revoká e Landsbesluit di 12 di febrüari 2017, ku a preskribí elekshon pa dia 28 di aprel 2017. E gobièrnu-interino ta basa esaki riba e moshon di Parlamento di 3 di mart 2017, den kua Parlamento a pidi gobièrnu pa revoká e Landsbesluit di 12 febrüari 2017 i retrosedé tur e konsekuensianan legal. 

A base di artíkulo 21 di e Reglamento pa Gobernador di Kòrsou, Gobernador no ta fiha (firma) un landsverordening òf landsbesluit, ora e konsiderá e verordening òf e besluit en pugna ku Statuut, un areglo internashonal, un lei di reino òf un algemene maatregel van rijksbestuur, o sea si ta trata di interesnan kaminda protekshon i garantia ta un asuntu di Reino.

Gobernador, den su kalidat di órgano di Reino, aplikando artíkulo 21 di Reglamento pa Gobernador, a partisipá gobièrnu di Reino ku lo e no ratifiká ei landsbesluit. P’esei el a presentá tal landsbesluit na gobièrnu di Reino. E ta di opinion ku e landsbesluit ta en pugna ku seguridat hurídiko i ku bon gobernashon. 

Outoridat di gobièrnu pa pasa na disolvé Parlamento a base di artíkulo 53 di nos Areglo di Estado no ta someté na kondishon. Artíkulo 53 di Konstitushon di Kòrsou no ta stipulá ku gobièrnu por pasa na disolvé Parlamento solamente si Parlamento mes aprobá esaki. Tal punto di bista lo ta eróneamente relashoná ku karakter di e derecho di disolushon pa resolvé konflikto ku Parlamento -manera pèrdida di sosten den Parlamento- mediante elekshon nobo. 

Ehersiendo e derecho di disolvé Parlamento ta hasi hustisia na e sistema di ‘checks en balances’ bálido entre e órganonan di estado den nos sistema di gobièrnu. 

Ta esensial pa funshonamentu di nos Estado di derecho demokrátiko ku den kaso di asuntunan fundamental kaminda ta trata di konfiansa den gobièrnu, i representashon den Parlamento, siudadanonan haña e oportunidat pa nan ekspresá nan mes mediante un elekshon general. Aki Gobernador ta mustra e kambionan relevante den e relashonnan den Parlamento despues di e último elekshon. 

E instrumento di disolushon lo no tin sentido si un gabinete (interino) ku a sinta despues di e desishon pa disolushon lo por revoká esaki. Karakter di un desishon di disolushon ta bai kontra ku esaki ta keda revoká. Esaki ta mas bálido ainda awor ku e desishon pa disolushon a drenta na vigor i a keda implementá, entre otro ku nombramentu di e miembronan di Konseho Supremo Elektoral i otorgamentu di outorisashon na e funshonarionan akí pa tuma na nan enkargo organisashon di elekshon. Den e sirkunstansianan akí un desishon kaminda ta revoká e desishon pa disolushon lo afektá gravemente tambe e derechonan demokrátiko di tersera. No solamente e derechonan di tur votadó di Kòrsou, sino tambe i partikularmente e derechonan di e partidonan polítiko ku entre tantu a inskribí pa elekshon. 

Gobernador ta mustra ademas riba e importansia ku den asuntunan di estado ta trata di un práktika establesé, di manera ku e konsekuensianan di e eskohonan polítiko ta pronostikabel. Ku esei seguridat hurídiko i konfiansa di siudadanonan ta sirbí. Na 2012 tambe Kòrsou a aten’é sin mas na e desishon pa disolvé Parlamento i kanta elekshon nobo ku mester a realisá. E tempu ei tambe e gabinete ku a tuma e desishon pa disolushon entre tantu a keda remplasá pa un gabinete-interino. E gabinete-interino di e tempu ayá sinembargo a kontinuá ku preparashon pa elekshon konforme e desishon di disolushon. Elekshon a tuma lugá riba e fecha stipulá. 

Banda di esei Gobernador no ta mira ningun rason pa konkluí ku disolushon den e situashon aktual ta kontra ningun areglo internashonal den kua tin ankrá derecho riba elekshon periódikamente. E echo ku artíkulo 25 di IVBPR i artíkulo 3 di e Promé Protokòl na EVRM ta indiká ku por lo general lo mester por trata di un periodo di seshon rasonabel di un parlamento, no ta ekskluí ku lo no por desviá di esei den kaso di sirkunstansianan partikular i den kaso ku sirkunstansianan polítiko i di gobièrnu ta pidi esei. Na su lugá ta tambe den e sentido akí un ‘márgen amplio di apresiashon’ ku ta bai pa e partidonan ligá na EVRM, ku ampliamente ta duna espasio pa rekonosé ofisialmente e desaroyo- i tradishonnan nashonal. Di importansia ta ademas ku protekshon di e derecho riba elekshon periódikamente a nase debí na e nesesidat pa komposishon di parlamento ta reflehá deseo di votadónan i ku no por ta asina ku no por mira komposishon di parlamento komo un refleho sufisientemente aktual di preferensianan di e votadó. Den e lus akí e elekshon preskribí pa dia 28 di aprel 2017 ta sin mas hustifiká i nesesario. 

E echo ku 11 miembro di Parlamento (entre kendenan 2 minister di e gabinete-interino aktual) a inisiá un prosedimentu na Korte Europeo pa Derecho Humano, di echo no ta hasi ku, pendiente e huisio di Korte Europeo, lo mester posponé elekshon. Korte Europeo no a husga atmisibilidat di e miembronan di Parlamento ainda, i no a duna tampoko previshon preliminar den e direkshon akí. 

Finalmente e desperfektonan den asuntu di e preparashonnan pa elekshon -manera alegá- no ta di tal índole ku lo no ta responsabel pa realisá e elekshon preskribí pa dia 28 di aprel 2017. Sentensia di Tribunal di Promé Instansia di Kòrsou di fecha 10 di mart 2017, di tur manera no a ofresé ningun motibu. 

Gobernador ta di opinion ku ta di suma importansia pa den e sistema demokrátiko di Kòrsou i su desaroyonan mas aleu ku elekshon di 28 di aprel 2017 ta tuma lugá. Ta imperativo pa hasi tur trámite pa e elekshon transkurí na òrdu tambe, di manera ku lo no por eksistí niun sorto di duda di e karakter liber i honesto di e elekshon i di balides di su resultado. Elekshon liber i sekreto ta un kondishon indispensabel pa un estado di derecho demokrátiko i na mes tempu tambe su esensia. Kualke akto ku trese esaki na peliger ta produsí un atake grave riba e estado di derecho demokrátiko di Kòrsou. 
***

Exit mobile version