Seferina Saragoza a selebrá 20 aña den servisio di gobièrnu di Boneiru

March 29, 2017 REDAKSHON

Kralendijk, Binti aña pasa Seferina (Rina) Saragoza su trayekto di trabou a inisiá komo empleado doméstiko na loke ántes tabata konosí kome departamentu di kultura di Boneiru dirigí pa sr. Felix “papi” Cicilia i ku awendia ta karga e nòmber SKAL Servisio di Kultura, Arte i Literatura.

Na aña 2002 Rina a sigui un kurso di telefonista na FORMA i ku awe Rina ta sertifiká komo telefonista.
Rina a sigui diferente otro kurso ku a yud’é hasi su trabou ku mas efisiensia i mihó resultado pa e servisio.
Banda di e trabou di telefonista Rina ta enbolbí den diferente aktividat ku SKAL ta organisá i semper ta kla pa yuda su koleganan.

Selebrashon di 20 aña di servisio di Seferina ta mustra nos bèk na un historia di determinashon i pashon pa su trabou. Rina a sa di gara oportunidatnan ku a paresé i saka e mihó di kada situashon ku a presentá. Awe nos ta rekonosé Rina komo un persona klave pa e Servisio di Kultura, Arte i Literatura (SKAL ) di gobièrnu di Boneiru.
Sra. Ally Pourier hefe di sekshon edukashon i bienestar tambe a dirigí palabranan di felisitashon na Rina i su famia ku tambe tabata presente na e selebrashon.
Norwin Coffie kolega di Rina tambe a gradisí Rina pa e bon trabou ku e ta ehersé diariamente pa ku e servisio i na su koleganan.

Diputado di kultura sra. Nina den Heyer a trese dilanti ku Rina ta e kara di SKAL mirando e echo komo telefonista e sa tur kos di e servisio pa asina e por duna kontesta na tur pregunta ku drenta.
Finalmente Diputado Den Heyer a hasi entrega di e ènvelòp i e sertifikado di rekonosementu na sra. Seferina Saragoza.