Ministerio Publiko ta informa
Info OM:
Awe Korte a trata e kaso penal di Ministerio Publiko (OM) kontra primunan L.M.Y. (16 aña) i B.G.Y. (19 aña).
Nan ta ser sospechá dor di OM ku nan tabata den poseshon dia 13 di september 2016 di 7 arma di kandela (3 pistol Glock, 3 pistol full outomatiko Glock i 1 shotgun), hopi munishon, 182.3 kilo di kokaina i 11.3 kilo di marihuana.
Ounke ku un di e sospechosonan ta menor di edat, tog a disidi pa trata e kaso ku “porta habrí”.
For di investigashon a bin sali na kla ku ta trata probablemente di droga i arma di kandela ku a yega tera for di laman den bahia di Sint Joris e anochi anterior 12 di september 2017 den kareda di 23:45 or.
E sospechosonan L.Y. i B.Y. no a kontesta ningun pregunta di Wes. Nan a hasi uso di nan derechi di keda ketu (zwijgrecht).
Fiskal a hasi un demanda awe den Korte di 6 aña di prison pa B.Y.
Pa menor di edat L.Y. “jeugddetentie” te su 18 aña. Ora e sali JIC mester sigi 6 luna ku supervishon elektroniko (enkelband). Tambe Fiskal a hasi demanda di 2 aña proeftijd i supervishon di Jeugdreclassering ku demanda pa e sigi skol.
Tambe Fiskal a pidi Wes konfiskashon (verbeurdverklaring) di un telefon selular, varios artikilo ku a haña den outo i konfiskashon di e vehikulo Toyota “Prado” ku a usa pa transporta e droga, arma i munishon.
Aki 3 siman Wes ta duna su veredikto den e kaso aki.