Hasi e evento aki eksitoso, e lo benefisiá Kòrsou sigur. Ban sostené Carifta Games masalmente.
Hasi e evento aki eksitoso, e lo benefisiá Kòrsou sigur. Ban sostené Carifta Games masalmente.
Willemstad, Ya for di sèptèmber aña pasá mi a kuminsá komo produktor di programa Bario pa Bario ku esfuersonan intensivo pa lanta e interes pa Carifta Games komo un oportunidat di oro pa duna realse na nòmber i imágen di Kòrsou den Karibe. Ya tabata konosí ku na e okashon aki alrededor di 600 atleta lo bishitá Kòrsou, kombiná ku un potensial grandi di turistanan di vários pais den Karibe. Tambe tabata sa ku FLOW lo transmití pa paisnan di Karibe i sobrá mundu!
Por lo ménos 7 edishon di programa na radio nos di Bario pa Bario a dediká pa konsientisá riba e balor i importansia di Carifta Games pa Kòrsou. Ademas nos a skibi relatonan den korant pa fomentá interes pa posibilidat i retonan ku un evento grandi asina ta abarká den e sentido organisatorio, deportivo, ekonómiko i promoshonal.
Kòrsou sinembargo na e momentonan aki ta pasando den un ambiente polítiko i gubernamental hopi lamentabel, siendo Carifta Games no a haña e embergadura tampoko ku tantu nos a anhelá i boga pe.
No opstante e sirkunstansia aktual nos ta hasi un yamada na pueblo di Kòrsou pa sostené Carifta Games masalmente. Laga nos konsentrá riba duna bon servisio, un ambiente hospitalario, yuda den siguridat di nos bishitantenan i pèrkurá pa un isla atraktivo, limpi i bunita.
Ku un públiko asistiendo na gran kantidat na e eventonan deportivo menshoná riba dianan 15, 16 i 17 den Sentro Deportivo Kòrsou, nos komunidat outomátikamente ta pone un base stabil di konfiansa pa mas eventonan di gran embergadura na Kòrsou. Sentro Deportivo Korsou ta lusi atraktivo i ta un rekurso deportivo ku ta kumpli ku eksigensianan internashonal. Ademas Korsou ta un isla sufisientemente desaroyá i ekipá ku rekurso i fasilidatnan ku sigur lo atraé e atenshon di bishitantenan di den Karibe
Carifta Games ta tuma lugá na Kòrsou despues ku lider i dirigentenan di nos pais a aserká e organisashon Karibense aki ku e petishon pa laga nos ta e anfitrion. Palabra awor ta na Kòrsou. Ban pe!!!!
