Diputado den Heyer ta boga pa tene otro informá: Reunion entre sindikatonan i representantenan di doñonan di trabou tokante akshon

Diputado den Heyer ta boga pa tene otro informá: Reunion entre sindikatonan i representantenan di doñonan di trabou tokante akshon

Kralendijk – djarason 5 di yüli diputado Nina den Heyer a yama un reunion ku sindikatonan i representantenan di doño di trabou ku e meta pa ámbos partida mantené otro informá. Durante e reunion tabata representantenan di USIBO, ABVO, BBE, Kamer van Koophandel, Bonhata, Bonaire Hospitality Group, i representante di direktorado Komunidat i Kuido i representante di departamento di Ekonomia di gobièrnu tabata presente.
Durante e reunion den Heyer a duna splikashon di e problema ku penshonado tin pa motibu di e dedukshon di 3.5% den penshun ta bini na vigor entrante 1 aprel. Den kaso ku no tin sufisiente fondo, otro aña lo por tin un redukshon adishonal di 12% den fondo di penshun. Den Heyer splika kiko e situashon aktual ta i tambe e akshonnan ku gobièrnu di Boneiru a tuma te ku awor. “Gobièrnu a manda un karta pa Asuntunan Sosial di Hulanda i BZK pa pidi Hulanda posponé e fecha di ehekushon ku seis luna. Gobièrnu di Boneiru konhunto ku gobièrnu di Saba i Statia lo buska un aktuario independiente i ekspertonan riba e tereno aki, kumpliendo ku e respektivo desishon di e konsehonan insular di Boneiru, Saba i Statia.” Segun diputado den Heyer.
Pa duna e representantenan di doño di trabou un bista kompleto di e situashon, presidente di e sindikato USIBO, Charles Mercelina na su turno a splika ku nan tambe a manda un karta pa den Haag i ku lo drenta den akshon dependiendo di e kontesta i reakshon riba e karta. E desishon pa e dedukshon ta afektá e poder di kompra di e penshonado i ta hasi e situashon di biba mas difísil.
Despues di un deliberashon representantenan di doño di trabou konhunto nan a tuma e desishon ku nan tambe lo manda un karta Hulanda pa Minister Plasterk sosteniendo e petishon ku gobièrnu i sindikatonan a hasi anteriormente pa duna mas tempu.