Site icon KIKO TA PASANDO NOTISIA I INFORMASHON

HENSLEY KOIEMAN; “NOS MESTER APOYA NOS ATLETANAN DURANTE CARIFTA GAMES” KORSOU POR TA HOPI ORGUYOSO DI TA E ANFITRION

Advertisements

HENSLEY KOIEMAN; “NOS MESTER APOYA NOS ATLETANAN DURANTE CARIFTA GAMES” KORSOU POR TA HOPI ORGUYOSO DI TA E ANFITRION

WILLEMSTAD: Hensley Koeiman, den un komunikado, ta hasi un apelashon na e pueblo di Kòrsou pa asistí di un forma masal na e gran evento di Carifta Games ku ta tuma lugá e fin di siman aki den Stadion Ergilio Hato. “Carifta games ta e kompetensia kaminda tur atletanan di Karibe ku a bira popular i gana medayanan na kampeonatonan mundial i Weganan Olímpiko a inisiá nan karera internashonal. Ta un oportunidat úniko pa wak nos top atletanan i otronan di regio kompetí, “Koeiman a bisa. “Atletanan komosí manera por ehempel Usain Bolt i nos Churandy Martina ta atletanan ku a partisipá na Carifta Games. Pues nos por ta testigu di diferente atletanan ku pronto lo ta konosí internashonal i ku lo marka pouta kibrando rekortnan riba plano internashonal.”
Ta importante pa risibí e hóben atletanan bon i sostené ann ku nos aplouso ki bon pa asina demonstrá ku nos ta un pais ku ta trata nos bishitantenan bon. Alabes nos ta inverti den nos industria di turismo komo ku tratando nos bishitantenan bon, lo subi e posibilidat ku nan lo regresá nos isla bek sea komo profeshonal den un empresa of gubernamental of komo un atleta profeshonal ku tin entrada haltu.
I ken sa lo abo tin oportunidat di saka portret ku e atletanan aki ku despues lo bira portretnan ku un balor haltu ora ku e atletanan aki bira mundialmente konosi i ta atletanan superstar.
E sosten i aporte di nos hendenan komo fanatikonan di nos atletanan sigur lo yuda nan pa saka lo maksimo di nan mes i di e forma ei logra presta maksimalmente ku posibelmente por nifiká un of otro medaya. Di tur parti di Kòrsou tin atletanan ku ta representá nos isla. Ban pa nos duna nos atletanan ánimo i resistensia ekstraordinario.
Den e tempunan difisil ku nos ta pasando aden, e evento aki i e prestashon di nos hóbennan por resultá den un señal pa nos sigui bòrda na desaroyo postivo di nos pais
Ban duna balor i rèspèt na e tantísimo trabou ku e kordinadónan, e boluntarionan, diferente medio di komunikashon i pais a hasi pa hasi e evento grandi aki posibel. Ban bishitá e evento aki masalmente pa asina e organisashon mama disidí ku pronto Kòrsou por bolbe organisá un Carifta Games atrobe.
“Bin ku famia pa ta parti di e gran evento, e gran fiesta di Carifta Games ku indudablemente lo krea pa Kòrsou tin mas heroe deportivo den atletismo, e deporte mama. Biba Korsou, biba deporte, biba atletismo.”

Exit mobile version