E eskases di maestro LOFO ta trese ensenansa den un zona di peliger si no tuma akshon apropia

Minister enkargá ku Asuntunan di Enseñansa, Siensia, Kultura i Deporte
Fort Amsterdam
Presente
 
Willemstad, 19 aprel 2017.
 
Tópiko:           petishon pa krea klaridat riba e puntonan di atenshon pa ku e estudio
di LOFO na Kòrsou.

Tin un eskases di maestronan di skol riba diferente nivel den enseñansa aki na Kòrsou. Pa lokual ta trata enseñansa di fundeshi, ta asina ku Kòrsou konosé su mes estudio ku ta wòrdu brinda na Universidat di Kòrsou bou di e nòmber di LOFO (Leraren Opleiding Funderend Onderwijs) pa por garantisá un fluho kontinuo di maestronan di skol pa por abastesé e merkado di enseñansa.
Den kombersashon ku diferente gremio den enseñansa suskrito a komprondé ku tin un eskases kresiente den e ramo aki i ku direktivanan di skol no ta haña sufisiente maestronan nobo for di e estudio di LOFO i ku esaki ta obligá nan di buska riba otro merkado apesar ku nan no ta kompletamente kompatibel ku e nesesidat di Kòrsou. Resientemente suskrito a komprondé ku tin un kantidat di maestro ku a reklutá for di Sürnam i ademas di esei un delegashon a regresá resientemente for di Hulanda kaminda tambe a hasi intentonan pa buska maestro di skol pa algun aña di moda ku por garantisá ku por sigui duna enseñansa aki na Kòrsou. Esaki mirando ku nos merkado lokal no tin sufisiente maestro pa apelá riba dje.
E eskases ta bira mas remarkabel dor ku no ta atraktivo mas pa maestronan penshuná duna nan aporte mas den enseñansa mirando e echo ku nan ta traha masha duru i na momento ku nan siendo den nan penshun bai duna un man pa aliviá e situashon di eskases den enseñansa, nan mester paga aparentemente 70% di nan entrada bek na impuesto awor ku gobièrnu a eliminá e asina yama “ontheffingsregeling”, kaminda nan por a paga algu ménos na impuesto.
Un otro aspekto ku ta pidi atenshon ta studiantenan-LOFO ku ta studia na UoC ta haña nan konfrontá ku kontratempu pa terminá nan pa motibu di e.o. organisashon i komunikashon i kambio di regla di wega ku ta perhudiká nan seriamente i hasiendo nan gastu pa estudio muchu mas haltu ku a premirá.
Tambe suskrito a komprondé ku prospektonan ku ke bira maestro di skol den futuro na ta risibiendo informashon tokante di e estudio pa LOFO. Aparentemente e areglo faborabel ku tabatin via di OWCS kaminda ku un studiante LOFO ta haña finansiamentu i ora e finalisá e estudio, mester traha minimalmente 5 aña den e kampo di enseñansa i haña eksonerashon di e debe, no ta wòrdu duna mas entrante 2013/2014. 
Finalmente suskrito a komprondé ku Minister di enseñansa a pidi NVAO (Nederlands- Vlaamse Accreditatie organsiatie) pa husga i duna un opinion riba e kalidat di e estudio  LOFO den kuadro di e Lei riba Enseñansa Avansá i sientífiko i ku tabatin diferente remarke pa mehorashon
Nos ta klousurando un aña eskolar ku hopi reto, prinsipalmente pa e echo ku nos tur por konstatá ku den ménos ku ménos ku 7 aña di gobernashon den pais Kòrsou, nos a konosé ya 8 minister di enseñansa, ku no ta duna un impreshon positivo pa enseñansa aki na Kòrsou.
Komo Parlamentario i sirbidó di nos pueblo ta importante pa por risibí un mihó bista riba e situashon. P’esei suskrito konforme artíkulo 96 di e Reglamento di Orden di Parlamento kier hasi e siguiente preguntanan na e minister:
1.      Mester garantisá enseñansa i formashon i tambe kupo di trabou pa nos hendenan. Kua ta e akshonnan ku gobièrnu ta tumando pa stimulá nos hóbennan pa bira maestro di skol pa garantisá kontinuidat di enseñansa i kontinuidat di labor pa nos mes hendenan lokal?
2.      A eliminá e “ontheffingsregeling”. Kua ta e insentivo pa tòg atraé e maestro penshuná pa yuda komunidat garantisá kontinuidat den enseñansa pa suavisá e eskases?
3.      Por laga hasi un investigashon kiko ta pasando na UoC ku e studiantenan tin e kontratempu pa finalisá nan estudio?
4.      Ta kuadra ku e areglo faborabel ku tabatin via di OWCS pa studiante LOFO haña finansiamentu preferensial (kaminda ora e finalisá e estudio e ta traha minimalmente 5 aña den e kampo di enseñansa i ta haña eksonerashon di e debe) no ta wòrdu duna mas entrante 2013/2014? Si esei ta e kaso, dikon a elimin’é?
5.      Suskrito por haña un relato di e remarkenan di NVAO a duna pa mehorá e kalidat di e estudio LOFO?

Sperando riba kontesta urgente, 
Drs. Marilyn Alcalá-Wallé (PAR)

Miembro di Parlamento di Korsou
Lider di Frakshon di PAR

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: