Trabou na viaduktonan ta okashoná desviashon di tráfiko
Trabou na viaduktonan ta okashoná desviashon di tráfiko
Willemstad – Minister Jaime Cordoba di Ministerio di Tráfiko, Transporte i Planifikashon Urbano i e organisashon Obra Públiko, ta atvertí ku trabounan nesesario na e murayanan na e viadukto di Skalo, ta bai okashoná desviashonnan den tráfiko. A skohe pa hasi e trabounan ku ta stanka tráfiko na e viadukto den wikènt, pa asina tin ménos molèster posibel.
Den e fin di simannan di 29/30 di aprel i 6/7 di mei próksimo, ta hasi renobashon grandi na e murayanan di viadukto Skalo, na altura di e kaminda paralelo na Abraham Mendez Chumaceiro Blvd, direkshon di Banko Sentral. Ta sera e kaminda pa tráfiko durante di e trabounan, pero tráfiko riba i bou di e viadukto ta keda habrí normal. E kompanianan, restorant, snèk i otro banda di e viadukto ta keda aksesibel pa públiko.
Riba e mesun fechanan ta hasi trabounan di renobashon na e otro banda di muraya di e viadukto di Skalo. Esei ta enserá ku ta sera e kaminda pa bai Plaza Mundo Merced (direkshon di The Movies) for di Scharlooweg. Ta sera e kaminda pa tráfiko durante di e trabounan, pero tráfiko riba i bou di e viadukto ta keda habrí normal. Tráfiko por pasa via e desviashon for di Abraham de Veerstraat for di Marshe nobo, pa por yega na Banko Sentral i besindario.
Obra Públiko i e kontratista Betonbouw B.V. ta traha último tempu na e diferente viadukto di Willemstad, ku for di tempu ku a traha nan den e mesun temporada ku Brùg Juliana, no a haña niun forma di mantenshon profundo. E viaduktonan tin diferente tipo di daño físiko i mekániko, manera betònmat frusá paden di e konstrukshonnan i daño na balustrada di e viaduktonan. E trabounan ta tuma lugá na un manera struktural i duradero.
