‘DEPORTE ARUBANO MESTER BAI PA ‘E PROXIMO NIVEL’

BENNY NISBET (PPA):
‘DEPORTE ARUBANO MESTER BAI PA ‘E PROXIMO NIVEL’ !’
PPA SU MANEHO PA LOGRA ESAKI LO ENSERA UN ACUERDO ENTRE GOBIERNO Y TUR FEDERACION DI DEPORTE, UN CONSEHO NACIONAL PA DEPORTE Y UN INSTITUTO PA DEPORTE ARUBANO(I.D.A)!’
‘E titulo di PPA su maneho deporte ta ‘Deporte den movecion pa e PROXIMO NIVEL ‘ y e meta ta pa stimula respect y comprendimento pa kada sector deportivo riba nos Isla, pa stimula cooperacion y participacion di TUR instancia deportivo na un maneho deportivo Nacional cu e meta pa stimula deporte arubano den tur districto y pa tur deportista hanja e espacio y sosten pa logra nan meta y pa stimula y jega nan meta di participacion regional y internacional.
PPA ta mira deporte como un instrumento pa activa hende den nos sociedad. Deporte te worde considera un jabi pa uni un sociedad cu ta hopi indivualisa. Realidad ta cu tur hende ni maske nan status ta topa cu otro riba tereno di deporte. Evenemento deportivo den cual nos prestacion ta bon y di nivel ta hisa e imagen di nos pais y e sentimento nacional. Un maneho cu ta tene cuenta cu e cambio di nos custumber y tradicion. Por ejempel tur hende kier hasi deporte durante e tempo cu ta cuadra cu nan ora liber. E maneho moderno aki ta exigi un maneho caminda cu deporte competitivo y recreativo ta forma un parti esencial di nos bida como ciudadano arubano. Tambe e parti social y salud den comunidad deportivo Arubano ta asina importante cu e ta un tarea primario di gobierno pa hasi tur cos posibel pa bin cu un maneho responsabel (moderno) cu tur e medionan disponibel.
Segun PPA un di e necesidad mas grandi den e mundo di deporte arubano ta e falta di lidernan cu ta dedica tempo na nos jovennan riba tereno deportivo. Hopi ta dedica nan bida na un deporte of un equipo pero no ta ricibi suficiente sosten den nan bario/districto pa e trabao valioso aki por continua. Tin vez pa falta di interes cerca nos grandinan…tin vez pa falta cu nos no a worde suficiente prepara pa e tarea aki. Den e cuadra aki PPA su maneho lo contribui na purba jena e vacio di lidernan riba tereno di deporte arubiano.
E piedranan importante di maneho di PPA riba tereno deportivo lo consisti di jega:
1. Jega na un ‘Acuerdo Nacional’ entre Gobierno di Aruba y tur Instancia importante den deporte arubiano cual lo ensera un acuerdo entre Gobierno di Aruba, Instituto pa Deporte Educacion fysico, Loto pa Deporte, A.S.U., Comite Olimpico Arubano y tur federacion di deporte arubiano. Meta di e acuerdo lo mester ta …drecha e clima deportivo entre e instancianan na un manera structura y stipula algun meta nacional riba tereno di deporte.
2. Jega na un acuerdo pa instala y nombra un ‘Conseho Nacional di Deporte’pa duna Conseho Nacional riba Deporte arubano na gobierno cu tur Instancia envolvi.
3. Funda un ‘Instituto pa Deporte Arubano’ (I.D.A.) cual lo ta den prome instancia un instituto pa prepara lidernan deportivo Arubano. E instituto lo ta un instituto na nivel di ‘mbo’ cual lo mester crece pa e nivel bachelor riba tereno deportivo. E instituto aki en cooperacion cu e diferente sector di deporte arubano lo organisa curso pa lidernan riba un ‘diversificacion’ di tereno deportivo. E instituto I.D.A. lo mester funciona en cooperacion cu instituto na Hulanda y Merca.

FINANZAS PA DEPORTE ARUBANO:
PPA lo reintroduci un maneho unda riba presupuesto general PPA lo percura cu worde poni un suma di placa pa inverti anualmente den projectonan riba tereno deportivo y nan mantencion.

CONSEHO NACIONAL PA DEPORTE ARUBANO:
E plataforma aki lo sirbi y discuti e problematica den e diferente deporte na Aruba.
A. Un desaroyo di deporte hunto cu e organisacion cu accento riba profesionalismo den e trabao’
B. Sincronisa y centralisa trabao cual lo trece mas recurso humano y miho control riba e parti financiero;
C. Acumula analisa dato relevante pa cu nos deporte;
D. Hasi investigacion relaciona cu salud na scolnan y na diferente otro organisacion;
E. Organisa hunto cu organisacion control, cursonan etc( y den futuro organisa pa I.D.A. !)
F. Pone entrenador diploma na disposicion di e diferente bond;
INSTITUTO DI DEPORTE ARUBANO (I.D.A):
Meta di I.D.A. segun PPA su vison lo mester ta:
• Inicia pa ofrece un programa na nivel di m.b.o. pa lider deportivo riba diversificacion di deporte ( meta ta pa den futuro esaki worde hisa tambe cu programa na nivel di ‘bachelor’ riba tereno deportivo…esaki lo tuma su tempo)
• Organisa junto cu e organisacionan deportivo curso riba tur nivel deportivo pa forma nos dirigentanan deportivo;
• Pa sostene y guia nos atletanan y Lidernan deportivo continuamente.
• Desaroya curson pa nos coachnan y trainer deportivo,segun filososfia di ‘Train the Trainer’.
• Stimula e trabao di educacion fisico di e maestro professional deportivo cu lo sigui despues di oranan di trabao;
• Stimula y sostene club, centro di bario y desaroyo di deporte en general.
• Organisa congreso, curso, tayer workshops, conferencia pa e.o. crea lider deportivo eleva consciencia encuanto e importancia di deporte.
E maneho di deporte di PPA lo tin como meta tambe pa stimula e sector di ‘Health & Wellness’ cu PPA ta e UNICO partido cu desde 2005 ta projecta nos vision pa desaroyo di e sector menciona.
PPA ta invita nos pueblo pa tuma nota di e maneho pa deporte projecta pa PPA aki ….PPA ta convensi cu Deporte Arubano tambe mester worde hiba …….NA E PROXIMO NIVEL….pa tal motibo nos ta invitabo pa ‘LEVELUPP…Switch y vota PPA e Unico partido politico Independiente den e arena politico arubano.
Aruba, 14 di mei 2017 Benny Nisbet
Lider Politico di PPA