Ultimo informashon di Outoridat Maritimo Korsou tokante zeta den laman

Ultimo informashon di Outoridat Maritimo Korsou tokante zeta den laman

Willemstad – Te ainda Outoridat Maritimo Kòrsou (MAC) no a risibí niun menshon di shushamentu di awanan kostal di Kòrsou. Ultimo dianan ta tin algun shushedat den forma di zeta riba kosto nort di Boneiru (Lac/Sorobon). Stinapa na Boneiru ta limpia esaki i ta hasi investigashon.

Mientrastantu a haña sa ku ta trata probablemente di zeta pisá ku tabata drif siman pasá dilanti kosta di Venezuela i kasi sigur ta bini for di Trinidad. E zeta tin algun tempu kaba den laman i ta drif den direkshon di Kòrsou i Aruba tambe.

MAC ta enfatisá ku no tin niun peliger berdadero na e momento aki. E problema si ta ku e zeta a fragmentá i ta drif bou di superfisie di awa, di moda ku no ta posibel pa wak e fásil for di airu of for di boto. E berdadero grandura ni lokashon di e shushedat no ta konosi i por lo pronto mester djis tene kuenta ku ta posibel pa algun shushedat di zeta ta yega nos kostanan.

Mirando esaki MAC ta informá komunidat ku outoridatnan ta vigilá e situashon. Huntu ku instanshanan konserní di Kòrsou i Boneiru, ta hasi preparashonnan pa un eventual akshon di limpiesa. MAC ta enfatisá ku no ta posibel pa kombatí e eventual shushedat riba laman, pa motibu di e índole di e shushedat i e tipo di zeta.

MAC ta pidi tur instansha i outoridat pa keda alertá den e dianan ku ta sigui i pa duna tur informashon despues di posibel opservashon di shushedat di zeta na e toren di informashon na Fort Nassau of na Rescue Coordination Center (RCC) di wardakosta. Den kaso ku bo mira shushedat di zeta den laman òf na kosta, por fabor no bai limpié bo mes, pero tuma kontakto mesora ku outoridatnan.

MAC ta konsehá tur hotèl lokal i doñonan di lokalidatnan riba playa, pa paga tinu i pa hasi preparashon pa avisá turistanan i hende ku ta bishitá playa. Meskos ta konta pa doñonan di skolnan di sambuyamentu i esnan ku ta hür boto i ‘Seadoo’. Sigui e website http://www.vvrp.cw i medionan lokal pa mas informashon tokante eventual desaroyonan.

This site uses Akismet to reduce spam. Learn how your comment data is processed.

Contact us



Connecting...
created by TelegramWordpress.com
error: Content is protected !!
%d bloggers like this: