Proyekto di Unesco i FuHiKuBo yegando su fin:Presentashon dokumental tokante kurandero djadumingu
Proyekto di Unesco i FuHiKuBo yegando su fin:
Presentashon dokumental tokante kurandero djadumingu
KRALENDIJK — Djadumingu awor, 4 di yüni, pa 7’or di anochi lo tin presentashon na públiko di un dokumental pa televishon tokante kuranderonan di Boneiru. Ta trata aki di un proyekto realisá pa Unesco i FuHiKuBo, den kua riba 10 persona a partisipá pa investigá i entrevistá hendenan ku a òf ta hunga un ròl den kuranderia. E presentashon ta grátis i ta tuma lugá den e sala di FuHiKuBo pegá ku ofisina di Extra.
Promé ku dékada sesenta di siglo pasá Boneiru tabatin solamente un dòkter pa kubri henter e isla. Originalmente, den siglo 19, título di e dòkter aki tabata ‘landschirurgijn’. Boneiru a konosé diferente dòkter, entre otro un yu di Papa Cornes i Ma Norchi, esta Jean Louis Marten van Strack.
E poblashon boneriano no tabata bai dòkter fásil. E hendenan tabata akudí mas tantu serka kuranderonan di e isla, tantu spesialistanan di yerba, haladó (humadó), haladó fisioterapista, skirbidónan di kolibrí komo hendenan ku tabata trata flamderos i otro enfermedatnan.
Den kuadro di e proyekto aki a entrevistá tantu kuranderonan ku ta praktiká ainda komo famia di esnan ku a fayesé. Tin hopi kos interesante ku a bini dilanti, manera presensia di tres hòmber di Anguilla ku tabata haladó fisioterapista, esta e rumannan Johnny i Alfred (Fefe) Mathew, tambe Tani Richardson. Kasá di Fefe, Pana Mathew-Egbrechts, tabata skirbi kolibrí.
A entrevistá kuranderonan ku ainda ta praktiká tambe, manera haladó/humadó Ernest Delannoy, spesialistanan di yerba Phelomena Beaumont-Janga, Petra Cecilia i Bèrná Emerenciana. Bob Harms a papia di orígen di e diferente formanan di kuranderia.
Mas aleu e investigadó i entrevistadónan a bai serka dòkter i pastornan pa skucha kiko nán ta pensa di kuranderia popular. Ta interesante pa skucha nan opinion.
Mester mira e proyekto aki den kuadro di esfuersonan di UNESCO pa salbaguardiá patrimonio kultural intangibel riba e islanan hulandes den Caribe.
–
Eksperto di yerba Phelomena Beaumont di Rincon.
–
–
Ernest Delannoy ta e generashon nobo di kurandero.
–