Gobièrnu di Kòrsou i diferente NGO huntu ta kordiná akshonnan di limpiesa. Willemstad – E tim intraministerial di Gobièrnu, ku ta enkargá pa kordiná i atendé ku derame di zeta na Kòrsou, a reuní awe ku entre otro Carmabi i Sea Turtle Conservation Curaçao.

Gobièrnu di Kòrsou i diferente NGO huntu ta kordiná akshonnan di limpiesa.

Willemstad – E tim intraministerial di Gobièrnu, ku ta enkargá pa kordiná i atendé ku derame di zeta na Kòrsou, a reuní awe ku entre otro Carmabi i Sea Turtle Conservation Curaçao.

E diferente representantenan di e ministerionan di GMN, VVRP, Asuntu General i Finansa, huntu ku e gruponan ambiental, a deliniá kon ta traha huntu den e limpiesadi e zeta ku a laba bin na algun kosta di nos isla i tambe na Klein Kòrsou.

E tim a sòru pa e gruponan tin akseso na diferente material pa hasi e trabou na un manera seif. Tambe a deliberá tokante transporte di e zeta pa bai Refineria Isla, pa deshasí di dje na un manera responsabel. Refineria Isla tambe a ofresé yudansa pa investigá e restunan di zeta ku a keda kolekshoná durante di e trabou di limpiesa.

Boluntarionan bou di guia di e gruponan ambiental menshoná, awe a limpia Boka Mansaliña i Boka Djegu. Mayan nan ta sigui na diferente otro lugá, kaminda a mira shushedat di zeta. E trabounan aki ta importante pa salbaguardiá e flora i founa bou di laman, protehá e turtuganan i paranan di laman ku aktualmente ta brui na òf serka di e áreanan afektá.

Kòrsou tin kontakto estrikto tambe ku Boneiru, Aruba i Venezuela pa vigilá e desaroyo di e derame aki i traha huntu kaminda tin mester. Boneiru no a eksperensia zeta nobo riba nan kosta despues ku nan a limpia den e dianan ku a pasa. Na Aruba ta parse ku tin mas tantu zeta ku na e otro islanan.

Na Kòrsou te ainda no tin dje tantu zeta, pero outoridatnan marítimo i di haf, huntu ku e NGOnan, ta sigui monitòr e desaroyonan konstantemente. Gobièrnu, huntu ku e gruponan ambiental, lo sigui duna informashon den transkurso di e dianan ku ta bini.