SpèlChèk pa Microsoft Office 2016, vershon 2.5, tambe riba merkado

SpèlChèk pa Microsoft Office 2016, vershon 2.5, tambe riba merkado

Ku sumo plaser FPI i su partnernan ta anunsiá ku for di promé di mei SpèlChèk pa Office 2016, vershon 2.5, ta riba merkado i ku nos wèpsait, www.kontrografia.com, tambe ta reflehá esaki.
Despues di hopi pasenshi i perseveransia porfin nos a logra terminá e proyekto tan importante akí.
SpèlChèk vershon 2.5 ta optenibel na FPI, Jan Noorduynweg z/n, e edifisio banda di Cost-U-Less, telefòn 8691166. Tambe na librerianan na Kòrsou, manera Mensing Caminada, i lugánan ku ta bende kòmpiuter, manera BetterDeals. Na Boneiru por kumpr’é na entre otro Addo’s Bookstore. Naturalmente por kumpra e kontrografia akí tambe via nos wèpsait www.kontrografia.com.
E preis a keda igual ku esun di vershon 2.0. Pa esnan ku ke kumpra mas ku 4 lisensia tin preis rebahá. Pa mas informashon por fabor tuma kontakto ku FPI.
Mester apuntá ku no ta trata aki di un upgrade, sino di un produkto kompletamente nobo meskos ku Office 2016 ta. E kos ku e 2 vershonnan tin komun ta e lista di palabra.
Tabata un kaminda largu. Na yüni 2015 SpèlChèk pa Office 2010 i 2013, vershon 2.0, a sali riba merkado. Apénas tres luna despues Microsoft a saka Office 2016, tantu pa PC komo pa Mac. Mesora petishonnan, prinsipalmente pa e vershon pa PC, a kuminsá drenta. Na e momentu ei nos tabata hopi okupá ku trahamentu di e promé vershon pa Office 2011 pa Mac, ku a bini kla na fin di òktober 2015 i ku a subi merkado na desèmber di mesun aña.
Na yanüari 2016 nos a tuma e desishon pa investigá kiko nos mester a hasi pa yega na un vershon di SpèlChèk pa Office 2016 pa PC. Meskos ku den e kaso anterior tokante Office 2010 i 2013, Microsoft tabata masha skars ku nan informashon tokante implementashon di un kontrografia di tersera parti den Office 2016. A dura te yüli 2016 promé ku tur informashon tabata konosí i ku nos por a tuma e desishon pa laga traha un vershon nobo. Na ougùstùs a firma kontrakt ku e kompania GridLine di Amsterdam ku a traha vershon 2.0 di SpèlChèk. Trabounan lo a kuminsá na sèptèmber i esakinan lo a terminá na òktober 2016.
Pa nos mala suerte nos a bin deskubrí ku Microsoft entre tantu a kambia su sistema di instalashon, ku el a yama Click-to-Run. Pa por implementá esaki den e sistema di SpèlChèk mester a kumpra i usa un pakete di software nobo.
Tèst di vershon di 64 i di 32 bit. E tèst ku vershon beta pa Office 2016, 64 bit, tabata eksitoso sin mas. Pero instalashon di un vershon di 32 bit bou di Windows 64 bit a resultá problemátiko. A kosta atrobe basta tempu i energia pa haña un solushon pa esaki. Pa kolmo despues a sali na kla ku kontrografianan di Microsoft tin e mesun problema i ku ta p’esei nan ta ekskluí esaki for di nan programa di instalashon. E or’ei a disidí di ekskluí e instalashon problemátiko akí di 32 bit for di nos sistema di instalashon i konsehá e usadó di 32 bit bou di Windows 64 bit pa upgrade su Office pa 64 bit.
Aunke mester opservá sin embargo ku, si un usadó ta deseá esei por usa SpèlChèk 2.5 ku un instalashon di Office 2016, 32 bit bou di un Windows di 32 bit.
Despues ku a solushoná e problema akí nos a haña nos na kuminsamentu di mart 2017 ku otro kontratempu. Via un mail di nos gateway provider na Canada (esunnan ku tabata prosesá pago ku credit card via nos wèpsait) nan a informá nos ku nan lo no sigui sirbi área di Karibe mas. Via nos banko nos a drenta e or’ei den kontakto ku un provider lokal (CX Pay). E paso di un provider pa otro a tuma mas tempu ku nos a spera. Komo konsekuensia di esei durante algun tempu no tabata posibel kumpra SpèlChèk via nos wèpsait. Entretantu esaki ta posibel atrobe. Nos ta pidi nos diskulpa na klientenan ku a purba, sin por a logra hasi nan kompra.
SpèlChèk semper bai na bo òrdu!

Advertisements

This site uses Akismet to reduce spam. Learn how your comment data is processed.

error: Content is protected !!
%d bloggers like this: