Dia, grupo i lugá di nos selekshonnan nashonal di dama U-17 i U-20 ya ta konosí! E partidonan lo tuma lugá di 19 pa 23 di yüli na Bermuda i di 2 pa 6 di òugùstùs 2017 na Trinidad & Tobago!
Dia, grupo i lugá di nos selekshonnan nashonal di dama U-17 i U-20 ya ta konosí!
E partidonan lo tuma lugá di 19 pa 23 di yüli na Bermuda i di 2 pa 6 di òugùstùs 2017 na Trinidad & Tobago!
Manera ya ta konosí e aña aki diferente selekshon lo bai representá Kòrsou na diferente parti di mundu. 2 di e selekshonnan aki lo ta nos selekshon nashonal di dama kategoria U-17 i U-20 ku lo sali pa Trinidad & Tobago ku Bermuda den luna di yüli ku òugùstùs binidero pa representá nos na e weganan pa kualifikashon di Karibe kategoria U-17 ku U-20.
Awe’tardi, 6 yüni, a tuma lugá na Miami e sorteo ku a determiná den kua grupo i unda nos selekshon nashonal di dama kategoria U-17 lo mester hunga.
Nos selekshon U-17 a kai den grupo A ku ta konsistí di e siguiente paisnan;
1. Trinidad & Tobago
2. US Virgin Islands
3. Grenada
4. Kòrsou
Huntu ku nos, tin 4 grupo mas ku lo partisipá na e torneo aki ku lo ta di 2 pa 6 di òugùstùs 2017 na Trinidad & Tobago.
E sorteo pa e selekshon di dama U-20 a tuma lugá ayera, 5 di yüni na Miami i Kòrsou ta forma parti di grupo B ku ta konsistí di e siguiente paisnan;
1. Bermuda
2. St. Lucia
3. Jamaica
4. Kòrsou
E partidonan aki lo tuma lugá na Bermuda i lo ta di 19 pa 23 di yüli 2017. Huntu ku nos tin 11 pais mas ku lo partisipá. Total ta forma un grupo di 12 pais ku a keda repartí den 3 grupo.
Sra. Gesilene Roojer-Kerindongo ta e entrenadó prinsipal di ambos selekshon i lo biaha ku un staf i un grupo di 18 hungadó pa representá nos na Trinidad & Tobago ku Bermuda.
E selekshon di dama U-17 ta praktikando for di aprel mientras esun di U-20 a kuminsá febrüari ku nan treining nan. Tur 2 selekshon ta trein 4 bia pa siman di kual 2 training ta dirihí riba e parti físiko, un ta konsentra riba e parti táktiko i tambe nan tin un wega di treining kontra diferente ekipo hubenil ku ta áktivo den nos kampionato hubenil.
Aparte di e 2 selekshonnan aki, nos selekshon nashonal di dama senior tambe ta pendiente pa bai representá nos pronto i e selekshon di dama U-15 tambe lo biaha na aña 2018.
Preparashon nan ta kontinuá pa nos damanan bai saka kara di nos dushi isla!