Ultimo encuentro entre studiantenan y Minister Yrausquin Studiantenan na Rotterdam gradicido na Minister Yrausquin pa atencion sincero pa nan situacion

Ultimo encuentro entre studiantenan y Minister Yrausquin Studiantenan na Rotterdam gradicido na Minister Yrausquin pa atencion sincero pa nan situacion

Den Haag – Despues cu Minister Plenipotenciario Juan David Yrausquin a cuminsa cu e serie di encuentro rond di Hulanda pa topa y combersa cu studiantenan Arubiano, recientemente a cera esaki cu e ultimo encuentro cu a tuma lugar na Rotterdam. Akinan Minister Plenipotenciario Juan David Yrausquin un biaha mas a papia di su meta cu tur e encuentronan aki, cu ta scucha loke e studiante Arubiano na Hulanda ta pasando den dje. Mescos cu tabata e caso na e encuentronan anterior Minister Yrausquin a tuma tempo pa a sinta papia y scucha loke e studiantenan tin di bisa riba nan bida como studiante. Hopi topico a keda trata di cual Minister Yrausquin lo bai pone nan den un plan di accion pa brinda mas sosten na nos studiantenan.

E siguiente paso ta pa bin cu puntonan di accion riba corto y largo plazo a base di e feedback cu Minister Yrausquin a haya di e studiantenan durante e diferente encuentronan.

Como parti clave di e anochi aki tabata e momento cu algun studiante a bai live via di Facebook pa conta riba nan experencia como studiante na Hulanda y special tocante Rotterdam como ciudad pa studia y biba. Nan a duna hopi tips na e muchanan cu ta preparando pa e aña aki bin Hulanda pa sigi un estudio avansa. Esakinan a varia di e preparacion na Aruba, con pa mehora bo Hulandes y e nesesidad pa mas tempran posibel busca un camber, cu no tur ora ta facil, pero cu ta exigi accion di e studiante.

Na final e studiantenan a expresa nan satisfaccion riba e initiativa di e minister pa cu e anochi aki y tambe nan a gradici e mandatario pa e invitacion.